Keda na altura di e último notisianan

Klek aki pa lesa dokumento

Ministerio di Finansa Inpekshon di impuesto. Algun siman pasá minister di Finansa, Javier Silvania ​a​ duna di konosé ku e dunadónan di trabou mester entregá e verzamelloonstaat di aña 2022 pa mas tarda promé di aprel 2023. Tambe a indiká ku e aña aki ta ​obligatorio pa inkorporá e number di crib di tur empleado. E anunsio aki a pone ku masha hopi petishon a drenta na Servisio di Impuesto. E petishonnan ta asina hopi ku no ta posibel pa prosesá tur promé ku promé di aprel. Pa e motibu aki tuma e desishon pa prolongá e fecha di entrega di e verzamellonstaat 2022 te ku djabièrnè 28 di aprel. Servisio di Impuesto ta hasiendo su máksimo esfuerso pa prosesá tur e petishonnan mas pronto posibel.  Entre otro ta traha number di crib outomatisá pa tur residente ku no tin un number di crib ainda. Aktualmente hopi persona ta hasi petishon pa un number di crib nobo aunke nan tin un number di crib kaba. Si bo haña karta di Servisio di Impuesto  (aanslag, aanma​n​ing òf verrekeningsbrief) semper e number di crib ta indiká riba esaki. Serviso di Impuesto ta ​supliká pa wak si bo number di crib ta riba e karta promé ku bo hasi petishon pa un number di crib nobo via www.belastingdienst.cw ​Diferente dunadó di trabou a indiká ku nan no tin e number di crib di ​e ​​empleadonan​ ku durante 2022 a sali for di servisio. Serviso di Impuesto ta trahando riba un solushon pa esaki ​i ​lo komuniká esaki na korto plaso.  Ta rekomendá tur dunadó di trabou pa kompletá e numbernan di crib di e empleadonan ku tabata den servisio te ku 31 di desèmber 2022. Servisio di Impuesto ta ​supliká ​tur dunadó di trabou tambe pa hinka e number di crib di tur empleado ku drenta servisio den nan atministrashon di salario. Lo keda obligatorio pa inkorporá e number di crib den e verzamelloonstaat. Pa no-residente tambe ta posibel pa pidi number di crib via www.belastingdienst.cw. Pa Servisio di Impuesto e nashonalidat òf estado di residensia no ta relevante den e kuadro aki. Ta fasilitá tur persona pa por paga nan debe di impuesto i prima.

Ministerio di Finansa Inpekshon di impuesto. ​Manera a duna di konosé anteriormente  e dunadó di trabou tin e obligashon pa inkorporá e number di crib di su empleadonan den e verzamelloonstaat di aña 2022.  Banda di esaki e dunadó di trabou mester inkorporá e number di crib den su atministrashon di salario. Tambe pa no-residente ta posibel pa hasi petishon pa un number di crib via e formulario riba www.belastingdienst.cw. Den e kuadro aki, e nashonalidat òf estado di estadia di e empleado no ta relevante pa Servisio di Impuesto. A fasilitá esaki pa asina tur persona por paga nan debenan di impuesto ​i p​rima. E dunadó di trabou por a entregá e verzameloonstaten di aña 2022 pa mas tardá 28 di aprel 2023. Pa aselerá e proseso di duna number di crib, na luna di mart Servisio di Impuesto a traha number di crib pa kasi 30.000 residente ku no tabatin number di crib ainda. Esaki a aselerá e proseso di dunamentu di ​number di crib na empleadonan ​i​ e dunadó di trabou. No opstante a determiná ku no ta posibel pa finalisá tur petishon pa e number di crib promé ku djabièrnè 28 di aprel. Pa e motibu ei a tuma e desishon pa prolongá e fecha di entrega di e verzamelloonstaat te ku​ promé di yüni 2023. Na yüni lo kuminsá atendé e deklarashonnan di impuesto riba entrada 2022.  Si e dunadó di trabou no a entrega e verzamellloonstaat, Servisio di Im​​puesto no por prosesá e deklarashon di impuesto riba entrada. Ta esensia​l ​pa e dunadó di trabou entregá e verzamelloonstaten na tempu, pa asina na yüni por paga restitushon di aña 2022.  Na e momentonan aki, ménos ku 50% di e dunadónan di trabou a hasi entrega di e verzamelloonstaat di nan empleadonan.

WILLEMSTAD - Entrante promé di aprel próksimo Servisio di Impuesto ta kobra interes riba debenan atrasá. Servisio di Impuesto tin e derecho pa kobra interes riba debenan atrasá konforme artíkulo 11 di e Ordenansa di Kobransa 1954.  E tasa di interes ku ta wòrdu apliká ta igual na e tasa di interes legal stipulá pa Banko Sentral di Kòrsou i Sint Maarten, ku na e momentonan aki ta 6.75%. E paso aki di Servisio di Impuesto mester sirbi komo un empuhe pa esnan ku ta debe impuesto paga nan debenan atrasá mas pronto posibel.  Pa limitá e impakto di e desishon aki riba esnan ku tin debe atrasá di impuesto, un areglo transitorio ta na vigor. Tur debedó di impuesto atrasá ku sera un areglo di pago pa pago kompleto di nan debe di impuesto promé ku 1 di yüli próksimo, i ku kumpli ku tur e kondishonnan ku ta aplikabel pa e areglo di pago, lo no mester paga interes riba debenan atrasá. Nan lo mester paga solamente e debe di impuesto nominal, inkluyendo eventual multa. Esaki ta aplikabel tambe pa empleadonan ku tin un demanda riba nan entrada pa paga e debe kompleto di impuesto. Den kaso ku no kumpli ku e obligashon di pago òf si akumulá debenan nobo di impuesto durante di e periodo di skema di pago, e ora’ei lo apliká e interes riba debenan di impuesto di tur manera.  Tur ku tin debe atrasá di impuesto i ku ta deseá pa hasi uso di e areglo transitorio aki no tin nodi di bini Regentesselaan z/n, pero por tuma kontakto via di nos formulario di kontakto ku un petishon pa un areglo di pago. Via di e mesun meil aki tambe por hasi petishon pa karchi di debedor aktualisá. Den e periodo benidero lo intensivá e akshonnan pa kobransa. Pa e motibu aki ta konsehá pa hasi uso di e periodo transitorio aki riba propio inisiativa pa asina evitá di mester paga interes riba debenan atrasá di impuesto i otro gastunan di kobransa adishonal.

WILLEMSTAD - For di 2010 Ontvanger ta apliká un regla di sanashon di debenan di impuesto i primanan sosial. Tambe a yega di apliká “opschoning” di e aanslag di impuesto i primanan sosial ku no a keda pagá.  Na aña 2015, por ehèmpel, a limpia e sistema di Ontvanger, pa medio kual a ekskluí mas ku ANG 900 mion di aanslagen di mas di 5 aña bieu. Sin embargo, ahustenan nesesario di maneho i di e organisashon pa evitá kresementu di e kantidat di aanslagnan atrobe no a tuma lugá e tempu ei.  Desde e instalashon di gabinete Pisas na yüni 2021, a duna prioridat na kobransa di debe di entre otro impuesto, primanan sosial i na eliminashon di atrasonan atministrativo di Servisio di Impuesto. Esaki tabatin hopi éksito pa ku entradanan di impuesto i primanan sosial i Servisio di Impuesto a pone hopi aanslag atrasá.  Dor di pone e aanslagnan atrasá, e suma ku mester a kobra a krese te ku un montante nominal di ANG 5.7 mil mion na debenan di impuesto i primanan sosial, partí over di 130.000 number di Crib. E kantidat aki ta hasi kobransa efektivo di tur debenan imposibel i ta buta ku tin ku stipulá prioridatnan pa ku kobransa di e debenan aki. Un ekipo di eksperto a hasi vários análisis pa determiná kon por redusí e kantidat di aanslag pa kobra na un nivel manehabel. Den e kuadro aki a keda kla ku e uso usual di fecha di aanslag (“dagtekening”) komo base pa prioritá, no ta kondusí na un efekto deseá.  Investigashonnan internashonal (OECD, 2019) ta demostra ku e probabilidat pa rekuperá debenan di impuesto ta redusí ku tempu. Un investigashon similar na Kòrsou a yega na e mes un konklushon: 50 % di entrada ta wòrdu optené den 2 aña despues di imponé aanslag i 90 % di entrada ta wòrdu optené den 5 aña. Pa e motibu aki e entrada después di 5 aña ta marginal, i ademas kobransa di aanslagnan mas bieu di 5 aña ta rekerí un kapasidat mas grandi ku kobransa di aanslagnan mas yòn ku 5 aña.  Na final di aña 2022, e kantidat di aanslag pa kobra dor di Ontvanger ta kontené aanslagnan te ku aña 1994. Pa redusí e kantidat di aanslag na un nivel manehabel i tambe pa duna e Servisio di Impuesto den su totalidat e oportunidat pa traha den aktualidat, Servisio di Impuesto a adaptá nan maneho di kobransa. Básikamente, adaptashon ta enserá ku aanslagen for 2017 of mas bieu lo no wòrdu kobra aktivamente. Esaki no ta enserá ku a duna eksonerashon (“kwijtschelding”), pero ku Servisio di Impuesto ta konsentrá riba kapasidat pa rekauda/kobra aanslagnan mas yòn ku posibilidat mas haltu di kobransa.  No opstante esaki tin 3 eksepshon riba e regla prinsipal di maneho di kobransa, kual ta lo siguiente. 

1. Aanslagnan di añanan 2017 i mas bieu lo wòrdu kobrá si esaki a wòrdu imponé den kuadro di un investigashon penal fiskal.
2. Si e debe di impuesto di e añanan 2017 òf mas bieu ta ANG 1 mion òf mas i si Servisio di Impuesto tin informashon ku ta demostrá ku tin posibilidat di kobransa.
3. Si e debe di impuesto di e añanan 2017 òfmas bieu ya a ser pagá via di kuentanan di tersero (derdenrekening manera entre otro di notarionan). 

E kambio di maneho aki tambe ta enserá ku apelashonnan (“bezwaarschriften”) pa añanan 2017 òf mas bieu lo no kedaprosesá mas, a ménos ku e kontribuyente indiká ku e tin interes pa esaki wòrdu prosesá. Esaki por ta e kaso si na momento ku konsedé / bai di akuerdo ku e apelashon, kual ta resultá den restitushon di un suma ku a ser pagá òf “verrekend”.  Di e forma aki, e ahuste di e kobransa di maneho tambe ta kontribuí na e redukshon di kantidat grandi di opheshonnan (“bezwaarschriften”).  Alrededor di 25% di aproksimadamente 45.000 opheshonnan (“bezwaarschriften”) relashon ku añanan 2017 of mas bieu lo mester a wòrdu prosesá ainda. Pa aña 2023 metanan a ser fiha pa Servisio di Impuesto, ku tin ku resultá ku e organisashon lo traha i lo sigui traha den aktualidat i ta mehorá e kalidat di servisio.  Si ta posibel lo hasi uso di ICT den e kuadro aki. Periódikamente, Servisio di Impuesto lo raporta na minister di Finansa, sr. Javier Silvania, en kuanto e progreso di e aktividatnan aki i pueblo tambe lo ser informá periódikamente. Willemstad, 3 di aprel 2023

​Na inisio di aña di impuesto 2019, Servisio di Impuesto a kuminsá manda e deklarashonnan di impuesto riba entrada di un forma outomatisá. Te ainda tin hopi hende ku no ta yena nan deklarashon korekto. Esaki tin komo konsekuensia ku no por saka e deklarashonnan ku fayo aden outomátikamente. Na 2023 mester hasi adaptashon na e portal pa asina por ​e​vitá sierto fayonan den e ​​sistema. Servisio di impuesto a traha un lista den e fayonan mas kometí ku sugerensia pa mehorashon. Entrega di e deklarashon di impuesto riba entrada ku e tipo di fayonan aki ta trese retraso den e finalisashon, pasó hopi di e fayonan aki por keda kor​eg​í manualmente so. Ta hasi un petishon na e kontribuyente pa purba evitá e fayonan aki pa asina evitá mas retraso. Dato personal (estado sivil) den e deklarashon:

1. E number di crib di e pareha no ta keda yená korekto. Si e number di crib di bo pareha no ta konosí, por hasi petishon pa esaki via di nos formulario di kontakto.
2. Pa impuesto riba entrada bo ta keda marká komo kasá si den henter e aña di impuesto bo tabata kasá i si abo i bo esposo/a tabata bibá na Kòrsou. Si den e aña di impuesto bo a drenta matrimonio, divorsiá, a bai biba sep​a​​​rá riba término largu òf bo esposo/a a fayesé, e ora ei pa e aña ei bo ta keda marká komo un kontribuyente no kasá. Den e kasonan aki mester yena ongehuwd (no kasá).
3. Si bo ta kasá, bo por entregá un petishon pa e hasi e ​​​imposishon separá s​i bo ta kasá buiten gemeenschap van goederen. Bo mester entregá un kopia di e akta di matrimonio pa esaki. Hopi pareha ta yena un petishon pa ​ ​​imposishon separá ​​ ku no ta nesesario/aplikabel.

Demas pregunta den e deklarashon:

1. E areglo di penshonado (penshonado regeling) ta aplikabel p’abo? E pregunta aki no ta aplikabel pa e penshonado lokal. E areglo di penshonado ta un areglo spesial pa e penshonadonan ku a bini for di eksterior ku mester kumpli ku sierto kondishon. Si bo ta un penshonado lokal ku un AOV-uitkering i òf otro forma di penshun, bo mester kontestá NO riba e pregunta aki.
2. Bo ta hasi petishon pa apliká e tarifa spesial (bijzonder tarief)? Hopi biaha ta kontestá e pregunta aki ku SI, kaminda no tin un parti di entrada riba kua e tarifa spesial aki ta aplikabel. Esaki ta aplikabel riba por ehèmpel ontslagloon i cessantia. Paga tinu! Pagonan di un biaha manera bónùs i sèn di fakansi ta kai den impuesto riba salario bou di e tabla bijzondere beloning. Esaki no tin nada di aber ku aplikashon di e tarifa spesial pa e impuesto riba entrada.​​

​Sueldo, penshon, ònderstant i ganashi di empresa:

1. E kontribuyente no ta indiká tur e entradanan for di otro servisionan laboral. E entrada menshoná lo keda oumentá ku e entradanan ku no a keda menshoná.
2. Gastunan di profeshon (dedukshon di ANG 500) hopi biaha no ta keda yená, kual ta un desbentaha pa e kontribuyente.
3. E werknemersdeel pensioenfonds no ta keda keda yená òf montantenan robes (prima AOV) ta keda yená aki. E montante korekto di e werknemersdeel pensioenfonds ta riba e karta di impuesto riba sueldo bou di wervingskosten.
4. Tur kaminda ku mester yena e prima total hopi biaha ta yena e werknemersbijdrage so. Anotá e datonan korekto ku tin riba bo loonbelastingkaart.
5. Retenshonnan di e​ks​terior (buitenlandse inhouding) ta keda yená komo retenshonnan lokal. Esaki no ta korekto. E retenshon aki no ta un imposishon (voorheffing) riba e impuesto riba entrada. Si bo tin entrada for di eksterior por hasi un petishon  pa asina evitá pago di impuesto dòbel.
6. E kontribuyente tin banda di su trabou un empresa uni-personal (eenmanszaak) pero no ta indiká e rendimentu di e empresa.

Pagonan periodiko:

1. E alimentashon risibí (konforme veredikto di hues) no ta keda indiká dor di e èks kasá.
2. E echtscheidingsuitkering ta un pago periodiko i ta forma parti di e entrada ku mester keda indiká.

Redukshonnan personal:

1. E kontribuyente ta indiká e prima total di AOV/AWW ku a keda retené, komo e prima di AOV/AWW ku a keda pagá riba e aanslag. Ora yena e prima di AOV/AWW ku a keda pagá riba e aanslag mester entregá un komprobante.
2. E kontribuyente ta indiká seguro di bida ku un pago di kapital (kapitaalsuitkering) komo un dedukshon personal.
3. E kontribuyente ta indiká un seguro di bida normal komo un seguro di riesgo di fayesimentu (overlijdensrisivoverzekering) ora di deskontá hipotek​a (hypotheekaftrek).​
4. E pago di debe di studio (studieschuld) ta personal. Mayornan ta paga e fiansa di estudio pa nan yunan i ke dedusí esaki for di nan propio entrada. Esaki no ta korekto.

Gastunan personal:

1. E kontribuyente ta claim dedukshon di kostonan di mantenshon di su kas kaminda e kas no ta un monumento protehá, konforme e Monumenteneilandsverordening Curaçao.
2. Seguro di kandela i aksidente ta keda yená kaminda esakinan no ta dedusibel.
3. Interes di fiansa personal (consumptief krediet) ta keda dedusí dos biaha: un biaha komo interes i gastunan di e fiansa bou di gastunan personal i un biaha mas komo interes di debe di studio bou di dedukshonnan personal. Esaki mester yena solamente na gastunan personal.
4. Interes di hipotek ta keda yená kaminda e kontribuyente no ta doño di un kas kaminda e ta biba prinsipalmente.

Kindertoeslag  i gastunan eksepshonal (buitengewone lasten) (gastunan di estudio di yu te ku 26 aña):

1. E kontribuyente ta yena e kategoria di kindertoeslag robes pa yunan ku ta studiando.  Determinante ta e edat di e yu riba promé di yanüari di e aña di impuesto i e skol kaminda e yu ta inskribí riba e fecha aki. E kontribuyente mester yena schoolverklaring pa yunan ku ta studia/bai skol entre 16 ku 27 aña.
2. E kontribuyente mester entregá e formulario I-20 pa yunan ku ta studiando na Merka huntu ku e deklarashon.
3. E kontribuyente ku ta claim e gastunan eksepshonal (buitengewone lasten) di yunan ku ta studiando mester entregá e deklarashon di DUO òf SSC ku e deklarashon di impuesto.
4. E kontribuyente no ta indiká un spesifikashon di e gastunan di estudio pagá. No por dedusí e sèn ku ta stòrt pa yu pa kubri gastunan di bida.
5. E kontribuyente ta yena gastunan di estudio pa yunan ku no ta studia na nivel di MBO, HBO òf Universidat.

​Gastunan eksepshonal (buitengewone lasten):

1. E kontribuyente ta yena gastunan di bida pa yunan bou di 27 aña ku ta malu sin ku e yunan ta malu.
2. E kontribuyente ta yena gastunan médiko pa famianan ku ta keda den un instituto òf kas di kuido sin un spesifikashon di e gastunan real. Gastunan di estadía, elektrisidat, awa, kuminda, bibida, waserèt i rekreashon no ta gastunan médiko.