Servisio di Impuesto ta kobra 6.75% di interes entrante 1 di aprel 2023

WILLEMSTAD – Entrante promé di aprel próksimo Servisio di Impuesto ta kobra interes riba debenan atrasá. Servisio di Impuesto tin e derecho pa kobra interes riba debenan atrasá konforme artíkulo 11 di e Ordenansa di Kobransa 1954. 

E tasa di interes ku ta wòrdu apliká ta igual na e tasa di interes legal stipulá pa Banko Sentral di Kòrsou i Sint Maarten, ku na e momentonan aki ta 6.75%. E paso aki di Servisio di Impuesto mester sirbi komo un empuhe pa esnan ku ta debe impuesto paga nan debenan atrasá mas pronto posibel. 

Pa limitá e impakto di e desishon aki riba esnan ku tin debe atrasá di impuesto, un areglo transitorio ta na vigor. Tur debedó di impuesto atrasá ku sera un areglo di pago pa pago kompleto di nan debe di impuesto promé ku 1 di yüli próksimo, i ku kumpli ku tur e kondishonnan ku ta aplikabel pa e areglo di pago, lo no mester paga interes riba debenan atrasá. Nan lo mester paga solamente e debe di impuesto nominal, inkluyendo eventual multa. Esaki ta aplikabel tambe pa empleadonan ku tin un demanda riba nan entrada pa paga e debe kompleto di impuesto. Den kaso ku no kumpli ku e obligashon di pago òf si akumulá debenan nobo di impuesto durante di e periodo di skema di pago, e ora’ei lo apliká e interes riba debenan di impuesto di tur manera. 

Tur ku tin debe atrasá di impuesto i ku ta deseá pa hasi uso di e areglo transitorio aki no tin nodi di bini Regentesselaan z/n, pero por tuma kontakto via di nos formulario di kontakto ku un petishon pa un areglo di pago. Via di e mesun meil aki tambe por hasi petishon pa karchi di debedor aktualisá. Den e periodo benidero lo intensivá e akshonnan pa kobransa. Pa e motibu aki ta konsehá pa hasi uso di e periodo transitorio aki riba propio inisiativa pa asina evitá di mester paga interes riba debenan atrasá di impuesto i otro gastunan di kobransa adishonal.