Tokante nos
Bo ke sa mas di nos organisashon?
Tokante nos
Servisio di Impuesto tei pa nos tur. Riba e página aki bo por haña mas informashon tokante di e forma kon e servisio ta organisá, kiko e tareanan di Servisio di Impuesto ta i kiko ta hasi ku e sènnan di impuesto ku wòrdu kobrá. Den e sentido general, Servisio di Impuesto ta responsabel pa imponé i kobra impuesto. Esaki ta nifiká ku di un banda e servisio ta perkurá pa tur impuesto ku ta den lei ta wòrdu imponé i di otro banda ku esakinan ta wòrdu pagá tambe.
E organisashonnan aki bou ta forma konhunto konekshonnan importante riba e tereno fiskal den Ministerio di Finansa.
- Sektor di Asuntunan Fiskal (SFZ)
- Inspekshon di Impuesto
- Ontvanger
- Stichting Belasting Accountants Bureau (Stichting BAB)
- Duana
Tin un kolaborashon estrecho entre Direkshon di Asuntunan Fiskal (DFZ), Inspekshon di Impuesto, Ontvanger i Stichting BAB. SFZ ta responsabel pa regulashon i maneho di imposishon i kobransa di impuestonan. Den e kuadro aki, e relashon ku e koleganan di e otro organisashonnan ta importante den formulashon di e regulashon i maneho, pasobra esakinan mester por wòrdu implementá. Tambe konsultanan mester por tuma lugá, si tin mester di mas splikashon tokante di disposishon legal òf maneho.
Sektor di Asuntunan Fiskal ta enkargá ku e siguiente tareanan:
- Formulashon di notanan i konsehonan di maneho i krea proposishonnan pa desaroyo, adaptashon, kontrol i (kumpli ku) ehekushon di e maneho fiskal;
- Kordinashon di maneho fiskal ku otro ministerionan, outoridatnan gubernamental, órganonan atministrativo independiente i instansianan privá ku tin relashon ku maneho fiskal;
- Atendé e interesnan fiskal di Kòrsou den relashonnan di Reino, internashonal i regional;
- Preparashon, implementashon i maneho di lei i regulashonnan den asuntunan fiskal, i kontrolá i sostené kumplimentu ku e lei i regulashonnan aki;
- Perkurá pa e kuadro legal i maneho nashonal di derecho di importashon i aksèinsnan. Kontrolá ehekushon di e kuadronan ei i e kalidat di e derecho di importashon i aksèinsnan;
- Perkurá pa e kuadro legal i maneho nashonal di impuestonan i kontrolá e ehekushon di e kuadronan aki i e kalidat di impuesto;
- Supervisá e proseso di kontrol na benefisio di e kobramentu di impuesto.
Inspekshon di Impuesto tin e tarea pa implementá lei di impuesto na un forma efisiente i íntegro. Inspektor di Impuesto ta formalmente responsabel pa implementá e diferente ordenansanan nashonal, dekretonan nashonal ku ta kontené medidanan general, kartanan, areglonan i BRNC, ku ta trata di impuesto, seguro di trahadó i seguro di pueblo. E reglamentashon aki ta indiká e diferente tareanan i responsabilidatnan di Inspekshon di Impuesto, pero tambe e debernan di e kontribuyentenan. Inspekshon di Impuesto ta enkargá ku ehekushon di e siguiente impuestonan:
- Impuesto riba entrada
- Impuesto riba salario i primanan di AOV/AWW, BVZ i AVBZ
- Impuesto riba ganashi
- Impuesto riba propiedatnan inmovibel
- Impuesto riba benta
- Impuesto riba herensia
- Impuesto riba traspaso di vietnam (propiedat)
- Ordenansa di registrashon 1908
E tareanan prinsipal di Inspekshon di Impuesto ta:
- Perkurá i promové korekshon di kobransa, kontrol i investigashon penal di impuestonan i primanan di seguro di trahadó i seguro di pueblo;
- Stimulá kumplimentu, loke ta nifiká ku kontribuyentenan i distribuidónan di informashon ta kumpli ku e debernan fiskal for di propio inisiativa.
Ontvanger ta enkargá ku kobransa di diferente impuesto i prima sosial.
E tareanan mas importante di Ontvanger ta:
- Kobransa i pagamentu di impuestonan i primanan di seguro di trahadó i di pueblo, ku ta wòrdu pagá via di deklarashon, òf kobrá via di aanslagnan;
- Kobransa i pago di impuestonan i primanan ku ta wòrdu kobrá via di deklarashon;
- Kobransa di impuesto riba vehíkulo motorisá (number di outo);
- Kobransa di derecho di importashon, impuesto di stampia, i aksèinsnan;
- Hasi gastu i pagonan na nòmber di gobièrnu;
- Hasi diferente pago na benefisio di pais, manera restitushon di impuestonan;
- Duna konseho i informashon tantu na pagadónan di impuesto komo na instansianan relevante.
Stichting BAB ta perkurá pa mehorá kumplimentu ku impuesto di tur kompania na Kòrsou.
E tareanan prinsipal di SBAB ta:
- Hasi investigashonnan di buki di impuesto i primanan na Kòrsou;
- Realisá un variedat grandi di trabou ku ta promové kumplimentu.
Pa mas informashon tokante di Stichting BAB por bishitá e página di Stichting BAB, www.stichtingbab.com.
Duana ta enkargá ku tareanan fiskal i tareanan no fiskal. Bou di tareanan fiskal ta kai imposishon, kontrol, kobransa i investigashon penal di derecho di importashon i aksèinsnan. Bou di tareanan no fiskal ta kai kontrol i investigashonal penal di importashon, eksportashon i tránsito di produktonan prohibí. Bou di tareanan no fiskal ta kai tambe supervishon di kumplimentu ku lei na momento ku e produktonan ta krusa frontera.
Pa mas informashon tokante di Duana por bishitá e página di Duana Kòrsou, www.douane.cw.
E sènnan di impuesto ku wòrdu risibí ta forma e fuente di entrada di mas grandi i primario pa Pais Kòrsou. Un gran parti di e gastunan di gobièrnu ta wòrdu finansiá ku sèn di impuesto. Ehèmpel di esakinan ta e posibilidat di por brinda enseñansa i maneho i mantenshon di kareteranan. Pues, pa por perkurá pa un bon funshonamentu di e fasilidatnan di gobièrnu pa Kòrsou i su habitantenan, ta di sumo importansia pa Servisio di Impuesto ehersé su tareanan sigur i ku presishon. Servisio di Impuesto ta di Kòrsou, pero prinsipalmente tambe pa Kòrsou.
Den e Ordenansanan Nashonal i/òf ordenansanan fiskal abou bo ta haña tur informashon relashoná ku lei fiskal (lei di impuesto) na Kòrsou.
- Impuesto riba entrada den e Ordenansa Nashonal di Impuesto riba entrada 1943;
- Impuesto riba benta den e Ordenansa Nashonal di Impuesto riba benta 1999;
- Impuesto riba salario den e Ordenansa Nashonal di Impuesto riba Salario 1976;
- Prima Penshun di Behes (AOV) den e Ordenansa Nashonal di Penshun di Behes;
- Prima Penshun di biuda(o) i Werfano (AWW) den e Ordenansa Nashonal di Penshun di Biuda(o) i Werfano;
- Prima di Seguro General di Gastunan pa Malesanan Spesial, Lei di labizjan (AVBZ), den e Ordenansa Nashonal di Lei di Seguro General di Gastunan pa Malesanan Spesial;
- Prima di Seguro Básiko di Gastunan di Malesa (BVZ) den e Ordenansa Nashonal di Seguro Básiko di Gastunan di Malesa;
- Impuesto riba ganashi den e Ordenansa Nashonal di Impuesto riba Ganashi 1940;
- Impuesto riba herensia den e Ordenansa di impuesto riba herensia 1908.