Bo ta paga impuesto riba e entrada ku mester paga impuesto riba dje. E entrada ku bo mester paga impuesto riba dje, ta e entrada ku bo a gana den e aña fiskal ei, kitando e pèrdidanan ku mester deskontá ainda. E entrada zùiver ta e entrada kitando e dedukshonnan personal, gastunan personal i gastunan ekstraordinario. E entrada ta konsistí di: 

• Entrada for di trabou; 
• Ganashi di negoshi; 
• Entrada di kapital movibel; 
• Entrada for di biennan inmovibel; 
• Pagonan periódiko. 

Entrada for di trabou

Si bo ta den servisio di un dunadó di trabou bo ta risibí un suèldu, tambe yamá entrada for di trabou (salario). Na final di aña bo ta risibí serka bo dunadó di trabou un deklarashon anual, esaki ta wòrdu yamá tambe karchi di impuesto di salario. Bo deklarashon anual ta konsistí di e siguiente informashon:   

• E kantidat di suèldu ku bo a risibí 
• E kantidat di retenshon di AOV/AWW, AVBZ i primanan di BZ 
• E kantidat di impuesto riba entrada retené 

Bo por hasi uso di e deklarashon anual aki pa bo deklarashon di impuesto riba entrada. Den kaso ku bo tin diferente dunadó di trabou den un aña, por ehèmpel dor ku bo tin diferente trabou, bo ta risibí di kada dunadó di trabou un deklarashon anual. 

Ora bo ta risibí penshun esaki tambe ta kai den e entrada ku mester paga impuesto riba dje, i bo mester hasi deklarashon di esaki. Banda di esaki bo por ta gana algu èkstra, manera, un kompensashon ku bo ta risibí dor di hasi atministrashon pa un negoshi chikí. E entradanan aki tambe ta pertenesé na e deklarashon di impuesto riba entrada. 

Ganashi di kompania

Si bo ta propietario di un negoshi bo mester paga impuesto riba e entrada di e ganashi ku bo a gana. Pa mas splikashon mira “impuesto riba entrada – empresario”.

Entrada for di kapital movibel

Bou di kapital movibel ta kai entradanan manera interes i dividendonan, basta esakinan no ta bini for di kapital inmovibel (entradanan di kapital). Ta kobra impuesto riba e entradanan real.  

Na momento ku bo tin ménos ku 5% di akshonnan òf si bo no tin interes konsiderabel den un kompania eksonerá òf un kompania di invershon den eksterior, no ta importante si bo a risibí dividendo for di esaki. Aki ta trata di rendimentu fiktisio. E rendimentu fiktisio ta 4% di e balor den e sirkulashon ekonómiko na inisio di aña. 

Si bo ta un interesado konsiderabel, ta kobra impuesto riba e entrada di interes konsiderabel na un tarifa di 19,5%. Entrada di interes konsiderabel ta e benefisionan regular i e benefisionan di benta di e partisipantenan interesado di un BV òf NV den kua e interesado tin un interes konsiderabel. 

Entrada for di propiedatnan inmovibel 

Si bo ta disponé di propiedat i ta hür esaki, bo mester indiká 65% di e entrada real den bo deklarashon. Interes i gastunanan ku ta bini for di fiansa, ku ta relashoná ku e propiedat ei, tin mag di wòrdu kitá for di e entrada ku bo mester paga impuesto riba dje. E primanan mará na e fiansa aki tambe tin mag di wòrdu dedusí. 

Pagonan periódiko

Un pago periódiko ta un pago ku bo ta risibí regularmente. Ora ta trata di pago periódiko, e pago mester kumpli ku un kantidat di kondishon. E kondishonnan ta lo siguiente: 

• E pagonan mester tuma lugá regularmente; 
• E pagonan mester bini for di e mesun kousa; 
• E kantidat total ta insigur; 
• E pagonan ta stòp manera bo muri.

Un ehèmpel di un pago periódiko ta un penshun di bida ku ta wòrdu pagá via di pago di un seguro di bida.

Pagonan periódiko ku no ta kumpli ku e kondishonnan ariba menshoná ta kai bou di un otro tipo di entrada, por ehèmpel entrada for di trabou, i mester wòrdu inkluí komo tal den e deklarashon.