Impuesto riba entrada – Empresario
Impuesto riba entrada – Empresario
Si bo tin un empresa unipersonal (eenmanszaak), bo mester mèldu bo ganashi di kompania, ku presentashon di un balansa i un kuenta di pèrdida i ganashi, den bo deklarashon di impuesto riba benta.
Si bo ta partisipá ku bo aktividatnan na e tráfiko ekonómiko i por spera ganashi, nos ta papia di un fuente di entrada. E ora ei posibelmente bo ta un empresario pa impuesto riba entrada. Si e aktividatnan ta tuma lugá den e esfera di hòbi i di famia, e ora ei bo no ta un empresario pa impuesto riba entrada.
Si bo tin un negoshi propio òf ta ehersé un profeshon independiente, bo ta obligá pa mantené un atministrashon aseptabel di bo entradanan i gastunan. Pa kalkulashon di bo ganashi bo mester tene kuenta di tur manera ku e siguiente puntonan:
Ora bo ta hasi uso di un outo bo mester tene kuenta ku e siguiente puntonan:
- Si e outo ta pertenesé na e kapital di bo negoshi i ta kai bou di e gastunan di e ganashi, bo mester tene kuenta tambe ku uso privá.
- Pa uso privá bo mester suma 15% di e balor nobo original di e outo, inkluyendo impuesto riba benta i impuesto di importashon, na e ganashi.
- Loke ku por wòrdu kitá for di e ganashi, ta e máksimo di e gastunan real ménos 15% di e balor nobo di e outo, inkluyendo impuesto riba benta i impuesto riba importashon.
- Si e outo ta propiedat privá, e gastunan di e trepnan di trabou, kitando e trafikashon entre kas i trabou (ANG 0.35 pa kilometer) por wòrdu registrá komo gastunan di kompania.
Si un bibienda ta pertenesé na e kapital di bo kompania i e ta pone na bo disposishon komo bo bibienda prinsipal, bo no mester agregá e preis di hür di e bibienda aki na bo ganashi.
Bo por dedusí e gastunan di mantenshon di e bibienda aki for di ganashi te na 2% di e balor di OZB di e bibienda (esaki ta e balor ku ta wòrdu usá pa apliká impuesto di propiedatnan inmovibel) ku un máksimo di ANG 3.000 (florin).
Si bo ta hür un propiedat inmovibel ku ta pertenesé na bo kapital di negoshi, ta kobra impuesto riba e total di e entradanan di hür i e gastunan manera mantenshon, seguro di kandela i depresiashon ta kompletamente dedusibel.
Gastunan restringí pa dedukshon ta gastunan ku bo ta hasi komo empresario, pero ku no ta dedusibel for di ganashi. E motibu ta pasobra e gastunan aki ta inkluí tantu elementonan komersial komo elementonan privá. E gastunan ku no por dedusí ta:
- E área di trabou, inkluyendo e mobilario, den bo bibienda si:
- si bo tin un lokalidat di trabou pafó di bo kas i bo ta gana ménos ku dos terser parti (⅔) di di bo entrada total for di labor, negoshi i profeshon den e lugá di trabou di bo kas; òf
- bo no tin lugá di trabou pafó di bo kas i bo ta gana ménos ku dos terser (⅔) parti di bo entrada total for di labor, negoshi i profeshon den òf pafó di e lugá di trabou di bo kas;
- Trafikashon entre kas i trabou;
- Barkunan ku ta wòrdu usá pa metanan di representashon;
- Vestuario, ku eksepshon di vestuario pa trabou;
- Literatura, ku ekspepshon di literatura di materia;
- Abononan di telefòn i konekshonnan di internèt na nòmber di e kontribuyente den privá;
- Kuido personal;
- Alimento, bebida, produktonan di plaser, representashon, resepshonnan, enkuentronan festivo, eskurshonnan, biahenan di estudio, inkluyendo gastunan di biahe i estadia;
- Gestonan i regalonan pa mantenshon di relashon;
- Multanan di sèn;
- Gastunan relashoná ku kondena di un delito;
- Gastunan pa prevení persekushon di kondena;
- Plaka di soborno.
Dedukshon di invershon ta duna un dedukshon riba ganashi di negoshi. E dedukshon di invershon ta determiná dor di e kantidat di invershonnan den inventario di kompania den un aña. Inventarionan di kompania ta e kosnan ku e kompania ta usa pa un periodo largu, por ehèmpel, un mashin, outo, edifisio òf kòmpiuter. Si e invershonnan total keda bou di e límite di ANG. 5000 (florin), e dedukshon ta nulo. E dedukshon ta 10% di e kantidat di invershon.
Pa stimulá oportunidat pa trabou den konstrukshon, ta apliká un dedukshon oumentá di 30% di e suma invertí, pa invershon den mantenshon òf mehorashon di un monumento protehá. Un monumento protehá ta un monumento ku ta registrá den e registro públiko di monumentonan protehá di e Ordenansa di monumentonan di isla di Kòrsou òf un propiedat inmovibel ku ta situá den sentro di siudat.
No ta tur invershon ta bini na remarke pa e dedukshon di invershon. Inventarionan di kompania ku no ta bini na remarke pa dedukshon di invershon ta por ehèmpel:
- Terenonan, inkluyendo tereno di edifisionan. Tereno ta eksluí for di dedukshon, pasobra nòrmalmente tera no ta pèrdè su balor;
- Bibiendanan;
- Outonan di pasahero, a ménos ku e outonan aki ta destiná pa transporte di pasahero di trabou. Transporte di pasahero di trabou ta por ehèmpel taksistanan, bùs, ets.;
- Barkunan di plaser;
- Bolsanan di balor, demandanan i goodwill;
- Bòternan, kahanan i otro medionan di empake;
- Ophetonan di poko balor. Medionan di negoshi di poko balor hopi biaha no ta wòrdu aktivá tampoko, pero ta wòrdu inkluí direktamente komo gastunan di kompania.
Ora un kompania bende un medio ku bo a risibí dedukshon di invershon p’e, un pago di desinvershon mester tuma lugá for di e ganashi. E montante di pago di desinvershon ta konsistí di un porsentahe di e preis di transferensia (preis di benta). E preis di benta no ta mas haltu ku e suma di invershon. E porsentahe aki ta dependé di e porsentahe apliká na momento di invershon (10% òf 30%). Ta trata di desinvershon, ora e medio di e kompania a wòrdu bendé denter di 6 aña (pa edifiosonan 15 aña) despues di komienso di aña, ku e invershon a tuma lugá. Si bo a hasi invershonnan ku bo ta alegá dedukshon di invershon, bo mester agregá un deklarashon di depresiashon na bo balansa i un kuenta di pèrdida i ganashi, ku ta spesifiká kada medio di negoshi separá.
E entrada ku bo ta responsabilisá komo empresario (den bo deklarashon di impuesto riba entrada), en prinsipio ta igual na e benta total (suma di prestashonnan ku mester paga impuesto riba dje i ku no mester paga impuesto riba dje) ku bo a responsabilisá den bo deklarashon di impuesto riba benta den e aña fiskal spesífiko ei.