Impuesto riba herensia i impuesto riba traspaso di biennan (propiedat)
Impuesto riba herensia i impuesto riba traspaso di biennan (propiedat)
Si un hende fayesé i bo tin derechi riba un parti di su herensia, por resultá ku bo mester paga impuesto riba herensia òf impuesto riba traspaso di biennan.
Impuesto riba herensia ta un tipo di impuesto ku bo ta paga komo heredero, riba lokual bo a heredá for di e defuntu. Si e defuntu tabata biba na Kòrsou na momento ku el a fayesé. Si e defuntu tabata biba pafó di Kòrsou na momento ku el a fayesé, e ora ei bo ta paga impuesto riba traspaso di biennan si bo a heredá biennan inmovibel.
Komo heredero bo ta paga impuesto riba e balor di tur lokual bo a heredá di e defuntu. Abo komo heredero ta paga impuesto riba traspaso di biennan riba e balor di biennan inmovibel si e defuntu tabata biba den eksterior. Kada heredero mester paga impuesto riba lokual el a risibí for di e herensia.
Pa por determiná kuantu bo mester paga na impuesto riba e herensia ku bo a heredá, bo mester hasi deklarashon. E formulario di deklarashon di impuesto mester wòrdu entregá na e Inspektor promé ku e fecha ku ta indiká riba e karta di invitashon. Si bo no hasi deklarashon na tempu, e ora’ei bo ta risibí un karta di kobransa (aanmaning) for di Inspektor. Si ainda bo no hasi e deklarashon na tempu, bo ta risibí un multa di fl 500,- Mientrastantu ku e término pa hasi deklarashon no a pasa bo por hasi petishon pa suspenshon serka Inspektor pa bo por haña mas tempu pa entregá e deklarashon.
Mester kalkulá impuesto riba herensia riba e balor di herensia di e defuntu. Un herensia ta e balor total di e biennan i debenan di e defuntu. Si bo risibí henter e herensia, bo mester paga impuesto riba henter e herensia. Si bo haña solamente un parti, e ora ei bo ta paga impuesto riba e parti ku bo a risibí so.
Promé mester determiná kiko lo bo risibí den su totalidat, un parti di esaki ta eksonerá di impuesto. Pa e parti ku ta eksonerá ta konta, mas serkano bo tabata di e defuntu, mas haltu e eksonerashon.
E montantenan eksonerá ta:
| Pa e kasá òf partner di bida ku a keda atras: | ANG 240.000,- |
| Pa yunan òf ñetunan ku a keda atras: | ANG 80.000,- |
| Pa mayornan òf suegunan ku a keda atras: | ANG 80.000,- |
| Den tur otro kaso: | ANG 8.000,- |
Ta paga impuesto riba herensia riba tur loke sobra. Ta kobra e impuesto progresivo; Mas bo heredá, mas haltu e montante di impuesto. Banda di esaki, mas serkano bo tabata di e defuntu, mas abou e porsentahe i ménos impuesto bo mester paga.
Pa mas informashon tokante di porsentahenan, eksonerashonnan i ehèmpelnan di kalkulashon, por hasi uso di “Splikashon formulario di deklarashon di impuesto riba herensia/impuesto riba traspaso di biennan”.
Impuesto riba traspaso di biennan mester wòrdu kalkulá riba e balor di e biennan inmovibel òf biennan ku bo a hereda na Kòrsou di e defuntu ku no tabata biba na Kòrsou. E tarifa pa tur heredero ta igual na 8%. No tin eksonerashonnan aplikabel pa e impuesto riba traspaso di biennan.
Pa mas informashon tokante di kalkulashonnan por hasi uso di “Splikashon formulario di deklarashon di impuesto riba herensia/impuesto riba traspaso di biennan”.
Splikashon formulario di deklarashon di impuesto riba herensia/impuesto riba traspaso di biennan
Deskargá Toelichting aangiftebiljet successiebelasting/Overgangsbelasting
Tur e herederonan mester hasi deklarashon riba nan parti di herensia, independientemente si mester paga impuesto riba herensia òf impuesto riba traspaso di biennan. Bo por hasi deklarashon lòs for di otro, pero ta mas fásil pa tur heredero hasi deklarashon huntu i hasi uso di un formulario di deklarashon di impuesto. Tur heredero mester firma e formulario di deklarashon di impuesto si. Tambe bo por apoderá un otro persona pa hasi e deklarashon na nòmber di tur heredero, por ehèmpel e notario ku a atendé e tèstament òf e konsehero di impuesto.
Mester paga impuesto riba herensia i impuesto riba traspaso di biennan na landsontvanger. Pa hasi esaki bo ta haña un formulario di kobransa. Den kasonan ekstraordinario i bou di kondishonnan bo por aserká landsontvanger pa drenta un areglo di pago. Pa hasi esaki bo por tuma kontakto ku landsontvanger.
Si e aanslag ta desviá for di bo deklarashon i bo no ta di akuerdo ku e korekshonnan hasí, e ora ei bo por presentá un opheshon ofisial serka Inspektor denter di dos luna despues di e fecha ku e formulario di aanslag a wòrdu firmá.