Areglo di penshonado
Areglo di penshonado
E areglo di penshonado ta un areglo pa ekstranheronan riba 50 aña ku a emigrá pa Kòrsou.
E areglo di penshonado ta un areglo ku por duna benefisionan di impuesto pa entradanan di eksterior, i e konosé dos forma. E esensia di ambos areglo ta ku bou di sierto kondishonnan por kobra impuesto riba entradanan di eksterior na e tarifa di 5% (areglo bieu) of 10%. Tambe por skohe pa kobra impuesto riba entrada lùmpsùm (suma será) di eksterior di 150.000 florin (areglo bieu) òf 500.000 florin na un tarifa nòrmal, esaki independientemente di e entrada ku a gosa di dje di eksterior.
E areglo di penshonado ta aplikabel pa un persona di 50 aña òf mas bieu, ku ta risibí entradanan for di eksterior. Bo mester kumpli banda di esaki ku algun kondishon.
Pa bini na remarke bo mester kumpli komo kontribuyente ku e siguiente kondishonnan:
- 50 aña òf mas bieu;
- A biba por lo mínimo 60 luna siguí pafó di Kòrsou;
- A hasi un petishon na Inspektor di Impuesto pa wòrdu konsiderá komo penshonado, 2 luna despues ku a inskribí den registro sivil (kranshi);
- Tin un bibienda na Kòrsou na un balor mínimo di 450.000 florin pa uso propio, denter di 18 luna despues di a inskribí den registro sivil. E bibienda aki no tin mag di wòrdu di hür. Òf bo tin un monumento protehá ku tin un balor mínimo di 450.000 florin komo propiedat. E monumento aki no tin mag di wòrdu di hür. Den kaso ku bo hür esaki no tin mag di hasi esaki pa un periodo mas largu ku 4 luna denter di un periodo di 12 luna;
- Bo no tin mag di ta den un relashon laboral, ni tampoko no tin mag di traha riba bo mes òf ehersé otro labornan na Kòrsou. Si bo ta kasá bo partner tampoko no tin mag di hasi loke ya a menshoná. Pa esaki por tin algun eksepshon. Personanan ku a bin biba na Kòrsou promé ku 1 di yanüari 1998 por hasi uso ainda di e areglo bieu, basta nan a hasi un petishon den pasado i ta biba na Kòrsou.
Solamente entradanan for di eksterior, pues pafó di e fronternan di pais Kòrsou, ta kai bou di e areglo di penshonado. E siguiente entradanan neto ta wòrdu konsiderá komo entradanan for di eksterior:
- Entradanan di un relashon di trabou eksistente òf di pasado, òf otro tipo di trabou ku bo a òf ta hasi pafó di Kòrsou (Sigui referí na e eksepshonnan);
- Entrada for di un negoshi propio, den kaso ku bo no ta manehá e negoshi aki na Kòrsou, pero por ehèmpel via di un establesimentu permanente, representante permanente òf un apoderado;
- Entrada for di propiedatnan bien rais pafó di Kòrsou;
- Entrada di adelanto di debenan i saldo positivo di banko, ku eksepshon di fiansanan hipotekario di propiedatnan bien rais ku ta establesé na Kòrsou. Tambe adelanto di fiansanan ku bo tin di otro persona físiko/natural ku ta biba na Kòrsou òf otro kompania establesé na Kòrsou;
- Entrada di akshonnan di ganashi di un kompania den eksterior;
- Entrada di akshonnan òf komprobante di ganashi ku ta bini di un NV, BV òf otro sorto di entidat legal den eksterior;
- E ganashi di benta ku ta pertenesé na e akshonnan konsiderabel òf komprobante di ganashi di NV, BV òf otro entidatnan legal den eksterior;
- Entradanan di pagonan periódiko ku bo ta risibí di un debedó den eksterior;
- E interes inkluí den e pago di kapital di un seguro di bida ku bo ta risibí di un entidat legal den eksterior.
Ta kobra impuesto segun e tarifa progresivo pa tur otro entrada ku no ta kai bou di e tarifa di penshonado.
Un kondishon pa bini na remarke pa e areglo di penshonado ta ku abo, òf si bo ta kasá bo partner, no tin mag di ta den un relashon di trabou, no tin mag di ehersé trabou independiente ni niun otro tipo di trabou. Pero si bo tin un areglo di trabou di kua bo ta doño di por lo mínimo 40% in(mediato) di un entidat ku ta kontribuyente di impuesto riba ganashi na Kòrsou, i bo tin entrada komo komisario, bo ta bini na remarke ainda pa e areglo di penshonado. E entradanan aki no ta kai bou di e tarifa di 10% di e areglo di penshun, pero bou di e tarifa regular.
Si bo ta kumpli ku e kondishonnan di areglo di penshonado, bo por skohe pa un areglo sin entrada fiktisio òf un areglo ku entrada fiktioso. Si bo skohe pa e areglo di penshonado sin entrada fiktisio e ora ei ta kobra impuesto riba e entradanan real di eksterior na e tarifa di 10%.
Bo por skohe pa indiká un entrada lùmpsùm di eksterior di 500.000 florin. Esaki ta independientemente di kua entrada ku bo a risibí realmente for di eksterior. Entrada ku no ta kuadra ku e entrada real ta wòrdu yamá entrada fiktisio. Ta kobra impuesto riba e montante aki pa e tarifa nòrmal.
Si bo skohe pa e entrada lùmpsùm, e ora ei bo no por hasi uso di e provishonnan pa evitá dòbel impuesto di e Areglo Fiskal di Hulanda i Kòrsou. Pues bo no tin derecho riba evitá dòbel impuesto.
Ora bo hasi petishon serka Inspektor di Servisio di Impuesto bo ta hasi eskoho entre dos opshon. Si bo skohe pa e areglo kaminda ta kobra impuesto riba bo entradanan real di 10%, lo bo por skohe pa e opshon di e entrada lùmpsùm te despues di 3 aña.
Si abo, òf bo kasá, risibi entradanan for di relashonnan di trabou lokal, trabou independiente òf otro tipo di trabounan den un aña, e ora ei bo derechi pa apliká e areglo di penshonado pa e aña ei ta kaduká. E ora ei e tarifa nòrmal ta aplikabel riba henter bo entrada, pues tambe e entradanan ku bo risibí for di eksterior. Si a base di e motibu ariba menshoná bo pèrdè bo derecho riba e areglo di penshun pa dos aña siguí, e ora ei e derecho riba e areglo aki ta kaduká kompletamente. Lo bo no por hasi apelashon mas riba e areglo di penshun. Tambe ora bo keda sin hasi deklarashon di impuesto kompletu òf na tempu pa dos aña siguí bo derecho riba areglo di penshun ta kai afó. Pa finalisá, bo derecho riba e areglo ta kai afó ora bo tin mas ku 6 luna sin un bibienda ku tin e balor e mínimo di 450.000 florin pa uso propio, komo propiedat na Kòrsou.
Personanan ku a bin biba na Kòrsou promé ku 1 di yanüari 1998 por hasi uso ainda di e areglo di penshun bieu si nan a hasi petishon den pasado i ta biba na Kòrsou. Banda di un kantidat di kondishonnan bieu bo no tin mag di ta den un relashon di trabou, ni tampoko no tin mag di ta traha riba bo mes òf hasi otro tipo di trabou na Kòrsou for di 1 di yanüari 1998.
Si bo ta hasi uso di e areglo di penshonado bo ta obligá ainda pa kumpli ku diferente prima. Esaki ta enserá prima pa Seguro Básiko di Malesa (BVZ), Lei di Labizjan (AVBZ) i dependé di bo edat prima di Penshun di behes (AOV) i Penshun di Biuda(u) i Wérfano (AWW).