Bo a kumpra un vehíkulo nobo i ta deseá pa hasi uso di esaki riba karetera públiko di Kòrsou? E ora’ei bo mester laga registrá e vehíkulo aki den e registro di UOVV (Uitvoeringsorganisatie Verkeer en Vervoer). Pa hasi esaki bo mester traha un sita na Lokalidat di kùr (keuringslokaal) situá na Parera. 

Den e siguiente kasonan e vehíkulo mester wòrdu registrá: 

• Bo a kumpra un vehíkulo nobo serka un komersiante di outo na Kòrsou; 
• Bo a kumpra un outo segunda mano ku no ta registrá ainda i bo ke hasi transferensia na bo nòmber;
• Bo vehíkulo a bini for di eksterior komo parti di mobilario di mudansa; 
• Bo a kumpra un vehíkulo den eksterior. 

Despues di a registrá e vehíkulo ku un number di vehíkulo, mester kùr esaki. Esaki tambe ta sosodé via di un sita na UOVV. Si bo vehíkulo ta kumpli ku e eksigensianan di kùr, bo ta risibí un karchi di kùr di vehíkulo.  

Pa mas informashon tokante di aplikashon, kùr i trahamentu di sita, por bishitá e página digital di Lokèt di Pèrmit (Bentana di Informashon): Registrashon di vehíkulonan – Lokèt Digital (gobiernu.cw).

Despues ku e vehíkulo a wòrdu di kùr, e mester wòrdu segurá. 

Na momento ku e vehíkulo ta registrá, di kùr i segurá, bo mester paga e impuesto riba vehíkulo motorisá (number di outo) na Servisio di Impuesto (departamento di Landsontvanger) na WTC, C-Post òf ACU. Pa hasi esaki bo mester bai ku e siguiente dokumentonan: 

• Un karchi di kùr bálido (na momento di paga impuesto, e karchi di kùr mester ta bálido riba e fecha di pago); 
• Un komprobante di seguro bálido (na momento di paga impuesto, e prima di seguro mester ta bálido di tur manera te ku e fecha di pago).

Na e sitio ei bo ta risibí e formulario di deklarashon di impuesto riba vehíkulo motorisá (formulario hel) i bo mester yena esaki. 

Despues di pago di impuesto riba vehíkulo motorisá (number di outo) bo ta risibí un karchi di impuesto, ku bo mester hiba huntu ku e karchi di kùr pa bo tuma e plachi di number na lokèt di MRB na Servisio di Impuesto situá na WTC, Piscadera. 

Si e vehíkulo ta wòrdu registrá pa promé biaha, e ora ei bo ta paga e impuesto riba vehíkulo motorisá pa tur e kuartalnan ku a sobra di e aña ei. 

Despues ku bo risibí e plachinan di number, bo mester pega esakinan na e vehíkulo. E plachinan di number mester ta visibel i legibel na e lugá indiká. Si esaki no ta e kaso, bo por haña un multa.