Deklarashon di entrada
Un deklarashon di entrada ta un deklarashon ofisial ku ta indiká bo datonan di entrada pa un aña fiskal spesífiko. Bo ta risibí bo deklarashon di entrada for di Servisio di Impuesto. Bo por hasi petishon pa un deklarashon di entrada solamente si bo deklarashon di impuesto riba entrada ta entregá i prosesá.
Bo por tin mester di un deklarashon di entrada por ehèmpel pa:
- Hasi un petishon pa finansiamentu di estudio serka DUO (Dienst Uitvoering Onderwijs);
- Un kompensashon pa kuido dental òf un brel serka SVB (Sociale Verzekeringsbank);
- Un pèrmit di estadia i/òf re-unifikashon di famia na Servisio di Atmishon Kòrsou (Toelatingsorganisatie Curaçao);
- Un petishon pa asistensia legal di un abogado pro-deo;
- Un petishon pa penshun di AOV na SVB.
Riba bo deklarashon di entrada tin e siguiente datonan:
- Bo datonan di entrada;
- E aña fiskal ku e deklarashon di entrada ta relashoná kuné;
- Bo nòmber, number di Crib i number di ID;
- E stèmpel ofisial di Inspekshon di Impuesto.
Bo por hasi petishon pa un deklarashon di entrada na momento ku bo a entregá un deklarashon di impuesto riba entrada i Servisio di Impuesto a prosesá esaki.
Bo por hasi un petishon pa deklarashon di entrada dor di yena e formulario di petishon mas abou. Despues ku bo entregá e petishon bo ta risibí un meil ku un vershon digital di bo deklarashon di entrada manera esaki ta kla. Si bo a pidi pa risibí e deklarashon di entrada personal na bali di Inspekshon di Impuesto, bo por pasa tuma esaki einan.
Tambe bo por hasi petishon pa un deklarashon di entrada via di nos formulario di kontakto.
Den e petishon via di meil bo mester manda e siguiente datonan:
- Pa kua instansia tin mester di e deklarashon;
- Pa kua aña fiskal tin mester di e deklarashon di entrada;
- Un kopia kla di bo sédula, reibeweis òf pasport bálido;
- Bo nòmber, adrès i number di telefòn.
Si bo mes no por pasa tuma bo deklarashon di entrada, e ora ei bo por laga un otro persona tuma esaki pa bo. Nos ta yama esaki apoderashon. Si bo ke apoderá un otro persona, bo mester añadí e siguiente dokumentonan adishonal na e petishon:
- Un kopia kla di sédula, reibeweis òf pasport bálido di e petishonario;
- E formulario di apoderashon por eskrito firmá.
Bo por deskargá e formulario di apoderashon.
