Salida definitivo for di Kòrsou
Salida definitivo for di Kòrsou
Na momento ku bo ta bai bandoná Kòrsou di forma definitivo bo mester sigui algun stap. Ora bo ta bai den eksterior pa un periodo mas largu ku 8 luna òf si bo ta bai biba na un di e otro paisnan den Reino (Hulanda, Aruba i Sint-Maarten) pa mas ku 6 luna, tambe bo mester sigui e siguiente prosedura.
Na momento di salida definitivo for di Kòrsou, bo mester bai na e siguiente instansianan den e sekuensia aki:
- Servisio di Atmishon Kòrsou (Prinsenstraat 90);
- Korte Komun di Hustisia (Wilhelminaplein);
- Inspekshon di Impuesto (WTC Curaçao, Piscaderweg s/n);
- Ontvanger (WTC Curaçao, Piscaderweg s/n);
- Kranshi (Roodeweg 42);
- Servisio di Atmishon Kòrsou (Prinsenstraat 90);
Servisio di Atmishon Kòrsou ta entregá bo e formulario “Anunsio di salida definitivo”. Kada un di e instansianan menshoná (ku eksepshon di Kranshi, Registro Sivil), ta pone un stèmpel riba e formulario korespondiente komo prueba di e hecho ku bo a kumpli ku bo obligashonnan. Ta referí na e formulario komo “formulario di stèmpel”.
Mas abou ta ilustrá e kaminda ku mester kana pa por laga kita bo nòmber.
Personanan di nashonalidat Hulandes ku no a nase na Kòrsou, pero ku anteriormente a wòrdu atmití pa lei pa drenta Kòrsou, no mester sigui e prosedura aki. Den nan kaso na momento di salida definitivo for di Kòrsou nan pèrmit di atmishon pa lei ta kaduká. Pero, sí ainda nan mester:
- Paga tur multa habrí na Korte Komun di Hustisia;
- Hasi kuenta ku Servisio di Impuesto;
- Indiká nan adrès nobo;
- Kita nòmber for di Kranshi.
Personanan ku a wòrdu mandá pa BZK (Ministerio di Asuntunan Eksterno i Asuntunan di Reino) i militarnan tampoko no mester sigui e prosedura aki.
Bo mester informá Servisio di Atmishon Kòrsou ku bo ta bai bandoná Kòrsou di forma definitivo. Pa hasi esaki bo ta risibí un formulario di stèmpel serka Servisio di Atmishon Kòrsou. Lo bo risibí e promé stèmpel serka Servisio di Atmishon.
Korte Komun di Hustisia tambe mester duna su aprobashon pa bo por bandoná Kòrsou. Despues di pasa na Servisio di Atmishon Kòrsou, bo mester bai na Korte Komun di Hustisia ku e formulario di stèmpel pa risibí un di dos stèmpel. Aki nan ta kontrolá si bo no tin multa habrí. Despues di e kontrol aki bo ta risibí e di dos stèmpel.
Pa kuminsá ku e proseso di hasi kuenta ku Servisio di Impuesto bo ta bai Inspekshon di Impuesto. Hasi kuenta ku Servisio di Impuesto ta enserá, kumpli ku bo obligashonnan di impuesto, den kaso ku bo no a hasi esaki ainda. Despues, Inspekshon di Impuesto i Ontvanger, ta konfirmá ku bo a kumpli ku tur bo obligashonnan. E fecha di inisio mester ta entre 6 te 8 siman promé ku e fecha di salida.
Den kaso ku bo no a hasi esaki ainda, bo mester entregá e deklarashonnan di impuesto riba entrada na Inspektor di Impuesto, pa e periodo for di momento ku bo a kuminsá biba na Kòrsou te ku e fecha ku bo tin intenshon di sali for di Kòrsou.
Ora bo entregá e deklarashonnan bo mester indiká ku bo ta bai bandoná Kòrsou di forma definitivo. E ora ei e deklarashonnan ta bini na remarke pa wòrdu tratá di forma preferensial.
Den kaso ku bo ta doño di propiedatnan inmovibel na Kòrsou, seguidamente bo ta bai departamento di impuesto riba propiedatnan inmovibel. E impuesto riba propiedatnan inmovibel ta un impuesto ku ta wòrdu kobrá riba balor di propiedatnan inmovibel i e ta wòrdu kobrá na e propietario. Den kaso ku nunka bo no a risibi aanslag di impuesto riba propiedatnan inmovibel anteriormente, lo bo risibí e aanslagnan e momento ei ainda.
Inspekshon di Impuesto ta duna fecha i orario riba kua bo mester buska e aanslagnan di impuesto riba entrada, AOV/AWW, AVBZ, BVZ i Impuesto riba propiedatnan inmovibel. Relashoná ku esaki bo mester tene kuenta ku un término di tres siman, despues ku e deklarashonnan di impuesto riba entrada a wòrdu entregá i ku e datonan pa impuesto riba propiedatnan inmovibel a wòrdu suministrá. Inspekshon ta duna riba e fecha palabrá e notifikashonnan di e aanslagnan ku a wòrdu kobrá i e di tres stèmpel.
Si bo tin derechi riba restitushon bo ta haña un stèmpel serka Ontvanger. Den e kaso aki bo mester laga bo datonan ku ta di importansia pa bo risibí pago bèk atras. Bo no ta risibí e pago bèk mesora. Pa e motibu aki ta konsehabel pa bo mantené un number di kuenta di banko na Kòrsou. Den kaso ku bo mester paga Ontvanger ta duna bo e stèmpel despues ku bo a paga.
Ora bo tin un formulario kompletamente di stèmpel bo ta bai kranshi (registro sivil) pa laga kita bo bo nòmber. Esaki mester sosodé 10 dia promé ku salida.
Na momento ku bo a laga kita bo nòmber for di kranshi bo ta bai bèk na Servisio di Atmishon Kòrsou ku bo formulario di stèmpel. Einan bo ta risibí un stèmpel den bo pasport, esaki ta e pèrmit pa salida.
Si bo a paga un depósito bo ta risibí esaki bèk ora ku bo bai Ontvanger ku e formulario di stèmpel, e stèmpel den bo pasport i un petishon pa risibí pago bèk.
Si bo no tin nashonalidat Hulandes, ta konsehabel pa kuminsá e proseso por lo ménos 8 siman promé ku bo mester sali for di Kòrsou. Si bo tin nashonalidat Hulandes, ta konsehabel pa kuminsá e prosedura por lo ménos 6 siman promé ku salida for di Kòrsou.