Seguro Básiko di gastunan di malesa (Basisverzekering ziektekosten – BVZ)
Seguro Básiko di gastunan di malesa (Basisverzekering ziektekosten – BVZ)
1 di febrüari 2013 a introdusí konforme lei di Seguro básiko kontra di gastunan di malesa, e Seguro Básiko di gastunan di malesa, tambe konosí komo BVZ. E seguro básiko ta un seguro uniforme pa tur siudadano ku ta kai bou di e lei.
Tur siudadano di Kòrsou ta sigurá pa BVZ. Si bo no ta biba na Kòrsou, pero bo ta den servisio serka un dunadó di trabou establesé na Kòrsou i ku ta paga impuesto riba salario na Kòrsou, bo tambe ta sigurá pa BVZ.
Bo no ta sigurá pa BVZ si bo ta kai bou di un di e siguiente kategorianan:
- Si pa 31 di yanüari 2013 bo tabata sigurá pa gastunan di malesa serka un seguro privá na Kòrsou òf si bo tabatin un seguro di malesa ku kobertura mundial. Esaki ta konta tambe pa otro miembronan di famia ku e mesun pakete di seguro, ku mester duna por lo mínimo mesun protekshon ku BVZ;
- Si bo ta traha pa un dunadó di trabou establesé na Kòrsou ku ta konsiderá komo kargadó di rísiko propio;
- Si bo por keda sigurá serka bo antiguo dunadó di trabou despues ku bo a yega edat di penshun. Esaki ta konta tambe pa otro miembronan di famia ku e mesun pakete di seguro. E seguro aki mester tin por lo mínimo e mesun kobertura ku BVZ;
- Si bo ta eksonerá di partisipá na seguronan sosial a base di un akuerdo internashonal;
- Si bo ta traha pafó di Kòrsou pa un dunadó di trabou ku ta establesé na un otro lugá den Reino i bo ta risibí entrada for di esaki, i bo por proba ku nan ta sigurá pa gastunan di malesa;
- Si bo tin un pèrmit di estadia temporal na Kòrsou;
- Si bo tin yunan menor di edat ku a nase despues di 1 di febrüari 2013 i bo ta pertenesé na un di e kategorianan ku no ta sigurá.
E base pa kalkulá e prima di seguro básiko di gastunan di malesa ku mester paga ta e entrada anual – (ménos) e interes na bankonan nashonal, i e parti di interes ku ta konsistí di un pago di kapital di seguro di bida na un asegurado nashonal. Bo entrada anual ta enserá bo entrada bruto total pa e aña ei. Pues no ta tene kuenta ku gastunan personal, gastunan ekstraordinario i kompensashon di pèrdida.
- Den kaso ku bo entrada anual ta 12 mil (12.000) florin òf ménos, bo no mester paga prima.
- Den kaso ku bo entrada anual ta mas ku 12 mil (12.000) florin, bo mester paga un prima di 13,6%.
- Na un entrada anual di riba 12.000 florin, pero ménos ku 18 mil (18.000) florin e regla di skala di balansa, konosí komo ‘gliding scale’, spliká mas abou ta aplikabel.
- Si bo entrada anual ta mas ku 150 mil (150.000) florin, bo no mester paga prima riba e entrada adishonal.
- Si bo no ta sigurá mas pa AOV (esei ta nifiká ku bo no mester paga prima mas di AOV), e ora ei bo mester paga un prima di 6,5%.
‘Gliding scale’
Pa personanan ku tin un entrada di mas ku 12 mil (12.000) florin, pero ménos ku 18 mil (18.000) florin ‘gliding scale’ ta aplikabel. E skala aki ta duna un deskuento riba e prima. Mas haltu bo entrada anual ta, mas abou e deskuento ta. Na un entrada anual di mas ku 18.000 florin bo mester paga e total di primanan ku ta konta pa bo. Si bo no a biba na Kòrsou henter e aña, e montantenan indiká den e tabla mas abou ta wòrdu rekalkulá segun tempu.
| Deskuento | Pa un entrada anual di mas ku | Te ku un entrada anual di ménos ku |
|---|---|---|
| 3,8% | 12.000 | 13.201 |
| 2,8% | 13.200 | 14.401 |
| 1,9% | 14.400 | 15.601 |
| 1,1% | 15.600 | 16.801 |
| 0,6% | 16.800 | 18.001 |
Kuantu bo mester paga na prima ta dependé di kon haltu bo entrada for di kua bo mester paga prima for di dje ta. Si bo ta un trahadó, bo prima ta konsistí di un parti ku ta kai bou di dunadó di trabou (werkgeversdeel) i un parti ku ta kai bou di trahadó, e asina yamá ‘werknemersdeel’. E ora ei e dunadó di trabou ta retené e prima. Si bo no ta un trahadó, e ora ei bo ta paga e prima na momento ku bo risibí e aanslag di impuesto di entrada.
E prima pa BVZ ta wòrdu kobrá na bo persona pa medio di e aanslag di impuesto riba entrada. Si bo ta den servisio serka un dunadó di trabou, e dunadó di trabou ta retené bo prima. Si bo dunadó di trabou retené muchu hopi òf muchu tiki, e ora ei ta deskontá esei despues via di e aanslag di impuesto di entrada. Esaki ta konta solamente pa e parti ku ta kai bou di trahadó, e parti ku ta kai bou di dunadó di trabou si bo no ta risibí bèk.
Manera bo entregá e deklarashon di impuesto di entrada na Servisio di Impuesto, bo ta risibí un aanslag definitivo di impuesto di entrada serka Servisio di Impuesto. Tambe bo ta risibí un aanslag pa e prima di BVZ ku ta indiká kuantu bo mester paga. Den kaso ku bo mester paga, e datonan di pago tambe lo ta indiká riba e aanslag.
Si bo ta traha pa un dunadó di trabou ku ta konsiderá komo un kargadó di rísiko propio òf si bo mes ta sigurá pa gastunan di malesa serka un asegurado privá, bo ta risibí un deklarashon serka SVB. Bo mester añadí esaki komo prueba na bo deklarashon di impuesto riba entrada.
Pa mas informashon, manera tokante di e porsentahenan di e primanan ku mester paga, bo por klek riba e lenk , ku lo referí bo na e página di SVB.