Penshun di Behes (AOV)

AOV ta para pa Seguro general di Penshun. Esaki ta un seguro general pa komunidat ku ta para garantia pa duna penshun básiko na esnan ku yega e edat di penshun. E seguro di AOV pues ta konta pa tur hende, no solamente pa dunadónan di trabou i trahadónan, pero tambe pa personanan ku ta traha riba nan mes, amanan di kas, i otronan. 

Tur hende ku ta biba na Kòrsou i ta mas bieu ku 15 aña i mas yòn ku 65 aña, ta sigurá pa AOV. Bo ta sigurá pa AOV tambe si bo ta un empleado sivil di Kòrsou ku un pasport Hulandes i bo ta òf a biba temporalmente den eksterior, i ku pa e motibu ei bo mester hasi deklarashon di impuesto riba entrada komo kontribuyente di impuesto di pais. 

Si bo ta mas yòn ku 15 aña òf mas bieu ku 65 aña, e ora ei bo no ta sigurá pa AOV. Banda di esaki tin algun punto inkluí den e lei di Seguro General di Penshun di pais, ku ta indiká ku bo por ta eksluí for di AOV. Bo no ta sigurá si: 

• Bo ta un indokumentado;
• Pafó di Kòrsou bo ta sigurá kaba pa un seguro igual ku AOV/AWW/AVBZ; 
• Si bo ta biba òf ta laborá temporalmente na Kòrsou; 
• Bo partner i sobrá miembronan di famia ku ta biba akinan temporalmente tin un pakete di seguro igual pafó di Kòrsou. 

Den e kasonan ei Minister di Asuntunan Sosial lo duna un disposishon (‘beschikking’) ku bo por usa pa haña eksonerashon di kumplimentu ku e primanan aki. 

Kuantu bo mester paga na prima ta dependé di kon haltu bo entrada for di kua bo mester paga prima for di dje ta. Si bo ta un trahadó, bo prima ta konsistí di un parti ku ta kai bou di dunadó di trabou (werkgeversdeel) i un parti ku ta kai bou di trahadó, e asina yamá ‘werknemersdeel’. E ora ei e dunadó di trabou ta retené e prima. Si bo no ta un trahadó, e ora ei bo ta paga e prima na momento ku bo risibí e aanslag di impuesto di entrada. 

E prima pa AOV ta wòrdu kobrá na bo persona pa medio di e aanslag di impuesto riba entrada. Si bo ta den servisio serka un dunadó di trabou, e dunadó di trabou ta retené bo prima. Si bo dunadó di trabou retené muchu hopi òf muchu tiki, e ora ei ta deskontá esei despues via di e aanslag di impuesto di entrada. 

Manera bo entregá e deklarashon di impuesto di entrada na Servisio di Impuesto, bo ta risibí un aanslag definitivo di impuesto di entrada serka Servisio di Impuesto. Tambe bo ta risibí un aanslag pa e prima di AOV/AWW ku ta indiká kuantu bo mester paga. Den kaso ku bo mester paga bèk, e datonan di pago tambe lo ta indiká riba e aanslag.

Pagamentu di tur e primanan mester wòrdu hasí na Landsontvanger.

Ta rekomendá pa bo hasi pago di bo aanslag ‘online’ via di banko, riba un di e siguiente kuentanan di banko di Ontvanger:  

Na momento di pago ‘online’ via di banko indiká e siguiente datonan: 

• Number di Crib 
• Periodo/aña 
• Number di aanslag 

1 di mart di 2013 a modifiká AOV riba algun punto. Si bo a nase promé ku 1 di mart 1956 bo por skohe for di kua edat bo ke risibí AOV. Pa kada aña ku bo risibí AOV promé ku 65 aña, bo ta risibí ménos AOV. Sin embargo, bo mester paga prima di AOV te ku bo di 65 aña. 

Pa mas informashon, manera tokante di e porsentahenan di e primanan ku mester paga, bo por klek riba e lenk ku lo referí bo na e página di SVB.