Tin un kantidat di prestashon ku ta eksonerá pa impuesto riba benta. Den kaso di un eksonerashon no ta kalkulá i paga impuesto riba benta. Si ta trata di un prestashon eksonerá bo mester hasi deklarashon na Servisio di Impuesto ku e montante di e prestashon eksonerá.

E prestashonnan eksonerá ta lo siguiente: 

• Suministro di awa, koriente, gas, airu di stom i preshon dor di kompanianan di utilidat, i tambe e suministro di awa empaketá; 
• Suministro di pan, webu, aros, batata, grano, hariña, alimento pa mucha, fruta i berdura, ku eksepshon di fruta i bèrdura konservá òf di vris;
• Hürmentu di propiedatnan inmovibel pa durashon largu, ku ta mueblá i destiná, i ta wòrdu usá pa e hürdó komo bibienda permanentemente; 
• Transporte públiko riba kareteranan, i tambe servisio di transporte di skol; 
• E servisionan ku ta wòrdu prestá komo tal pa hòspitalnan, laboratorionan di investigashon médiko, dòkternan, dentistanan, téknikonan dental, enfermeronan i parteranan, fisioterapeutanan i terepeutanan di ehersisio, chiropráktikonan, logopedistanan, diëtistanan, sikólogonan i podoterapeutanan;
• Suministro di artefaktonan di arte i asistensia médiko. Bou di arte i asistensia médiko nos ta komprondé artíkulonan i aparatonan ortopédiko; esaki ta inkluí fahanan i banchinan kirúrgiko, tambe krùknan, – denturanan artifisial, djentenan artifisial, wowonan artifisial, partinan di kurpa artifisial i otro artíkulonan asina, aparatonan pa oído pa hendenan dof, spalk pa faktura i otro artíkulonan i aparátonan pa trata frakturanan den e sistema di wesu;
• Suministro di remedi pa hendenan, miéntras e remedinan aki ta wòrdu resetá pa dòkter a base di e Ordenansa Nashonal ku ta regulá e práktika di medisina;
• Kuida personanan ku ta keda den un instituto, i tambe e suministro di alimento i bebida, remedi i ferbant pa e personanan ei, i hür di alohamento no-komersial pa kuida personanan ku ta keda den instituto no komersial, sea ta e hòspital general òf hòspital nashonal di Pais; 
• Suministro di produkto i dunamentu di servisio dor di organisashonnan di naturalesa sosial, kultural, karitativo, deportivo òf religioso, basta e organisashon no ta enfoká riba fin di lukro i no ta trata di distorshon serio di relashon di konkurensia, inkluso suministro di produkto i servisio den e konteksto di un evento grandi na òf pa un organisashon ku Inspektor a konsiderá komo un organisashon karitativo, manera ta indiká den e Disposishon di evento grandi 2010; 
• Seguronan di bida, seguronan di kosto di malesa, i re-aseguronan dor di kompanianan di seguro, meskos ku servisio di persona intermediario na seguronan. Bou di seguro di bida nos ta komprondé un seguro ku su úniko òf kasi úniko meta ta pa kumpli ku un òf mas periodo di pago, i ku ta dependé di bida di e asegurado, inkluyendo seguro di entiero, independientemente di e forma di pago;
• Duna enseñansa no-komersial, komo tambe konferenshanan ku asistensia di por lo ménos 90% di no residente; 
• E servisio di pakete postal, ku e konsesor ta obligá pa transportá dor di e artíkulo 2, insiso 2 di e Ordenansa Postal di 1998, 
• Servisio di transportashon internashonal pa medio di avion òf barku. Bou di barku nos ta komprondé tur barku, usá òf adaptá pa uso komo medio di transporte riba awa, ku eksepshon di barku pa plaser; 
• Suministro di kombustibel, lubrikante i otro líkidonan destiná pa propulsá, lubrikashon i otro uso tékniko na bordo di barkunan manera menshoná den parti M. di avionnan, ku ta wòrdu usá komo medio di transporte públiko pa transporte internashonal di personanan òf karga, i tambe servisionan pa e barkunan i avionnan menshoná den e parti akí. E eksonerashon aki ta konta tambe pa barkunan i avionnan di guera;
• Servisio ku ta wòrdu ehekutá den un área marítimo òf di aeropuerto relashoná ku produktonan ku ta drenta i sali for di e área di pago di impuesto; 
• Suministro di produktonan na klientenan ku no ta biba òf ta establesé den e área di pago di impuesto i e produktonan ta wòrdu eksportá den kuadro di e suministro ei; 
• E suministro di kombustibel na kompanianan di utililidat pa produkshon di energia; 
• Suministro di produktonan, i tambe trabounan pa mantenshon di kompanianan di utilidat ku ta enfoká prinsipalmente riba suministro di awa, elektrisidat, gas, airu di preshon i airu na un refineria petrolero; 
• Suministro di produktonan i servisionan na refinerianan petrolero, mientrastantu e suministro i servisionan aki ta tuma lugá pa operashon di e refinerianan aki; 
• Suministro di produkto i servisionan direktamente pa proyektonan, mientrastantu e proyektonan aki ta wòrdu pagá pa Hulanda, Aruba òf Sint Maarten òf den kuadro di yudansa di desaroyo ta wòrdu pagá pa organisashonnan internashonal; 
• Suministro di produkto i servisionan na embahadanan profeshonal i otro representantenan profeshonal di otro outoridatnan, nan funshonarionan agregá i e miembronan di nan famia i personanan ku ta biba i traha serka nan, tur basta ku ta ekstranhero i no ta empresario bou di kondishon resiprokó den e teritorio di pago di impuesto; 
• Suministro di produkto i servisionan bou di vigor di disposishonnan di libertat inkluí den e  interkambio di karta tokante un tratado di establesimentu di puntonan di sosten pa forsanan merikano na Kòrsou i Aruba relashoná ku aktividatnan di prevenshon kontra droga; 

E siguiente entrega i servisionan: 

• E transakshonnan, inkluyendo mediashon, relashoná ku divisanan, plaka di papel i monedanan ku ta e medio legal di pago den kualke pais, ku eksepshon di plakanan di papel i monedanan ku no ta wòrdu usá komo medio legal di pago òf ku tin un balor kolektivo; 
• E transakshonnan, inkluyendo mediashon, pero sin inkluí kustodia i maneho, relashoná ku efektonan i otro papelnan di balor, ku eksepshon di dokumentonan ku ta representá produktonan; 
• E servisionan ku ta duna oportunidat pa partisipá den weganan di kasino;
• Suministro di propiedatnan inmovibel ku ta someté na impuesto di transferensia; 
• E servisionan prestá pa abogadonan, konseheronan hurídiko i  fiskal, manehadó di kapital, dunadó di konseho di invershon, ofisina di atministrashon i trust, accountantnan, bankonan i notarionan na organisashonnan i personanan natural ku tin un dispensashon bou di e Ordenansa di trafikashon di Valuta di Kòrsou i Sint Maarten, i tambe e aktividatnan dirigí riba eksterior di e organisashonnan i personanan natural menshoná anteriormente. 
• Suministro di gas natural òf pa medio intermediashon di un stashon di transferensia di LNG;
• E aktividatnan dirigí riba eksterior pa Kompanianan di Invershon di Kòrsou. 

E siguiente entreganan tambe ta eksonerá di impuesto: 

• Suministro di produktonan lokalmente produsí, produktonan ku empresarionan ta usa komo produkto pa negoshi. E eksonerashon ta konta solamente pa e produktonan ku e provedor mes a transformá, traha òf ensamblá den un produkto nobo; 
• Suministro di produktonan ku ta wòrdu designá bou di e areglo ministerial general, ku ta eksonerá di impuesto na momento di importashon; 
• Suministro den e teritorio di pago di impuesto di produktonan ku no a wòrdu inkluí ainda den merkado liber na Kòrsou. E eksonerashon aki no ta apliká si e importashon di e produkto entregá ta kontraé e provishonnan di Reglamento General I. U. i D. 1908 no a tuma lugá.