Tarifa spesial
Tarifa spesial
Ta kobra impuesto na tarifa spesial riba algun entrada. Tin diferente tipo di tarifa spesial.
Tin un tarifa spesial di 8,5% ku ta pa sierto tipo di interes. Pa un kantidat di entrada ta konta un tarifa spesial di 19,5%. E dos tarifanan aki ta wòrdu apliká outomátikamente. No tin mester di hasi petishon serka Inspektor di Impuesto.
Tambe tin un tarifa spesial ku ta varia entre 17% i 34%. E tarifa aki ta wórdu apliká solamente riba petishon. Mester entregá e petishon na Inspektor di Impuesto.
Ta apliká e tarifa spesial di 8,5% riba interes di bankonan lokal i riba e parti di interes den pago di kapital di un seguro di bida na un asegurado nashonal. Esaki a wòrdu retené kaba dor di bo banko òf kompania di seguro.
E tarifa spesial di 19,5% ta konta pa e siguiente entradanan:
- Entradanan di kapital;
- Pagonan periódiko i pa un solo biaha ku bo a risibí di un SPF òf un trust;
- Benefisionan regular i benefisionan di benta di un interes konsiderabel.
Riba bo petishon ta kobra impuesto na un tarifa spesial di no ménos ku 17% i no mas ku 34% riba algun entrada. Esakinan ta entradanan ku den un aña spesífiko, ta relashoná ku mas aña. Manera:
- Indemnisashon di daño i perhuisio;
- Indemnisashon pa motibu di retiro;
- Ganashi for di traspaso di likides;
- Dividendo di likides riba akshonnan;
- Suma di reskate (pero no di penshun òf seguro di bida);
- Kompensashonnan destiná pa remplasá entrada pèrdi òf ku lo bai pèrdí.
E tarifa spesial ku ta varia entre 17% i 34% ta wòrdu apliká solamente riba petishon. E montante di esaki ta wòrdu determiná entre otro dor di e magnitut di otro komponentenan di entreda ku a risibí den e aña ei. E ora ei e tarifa menshoná den e otorgashon di e petishon dor di Inspektor no por wòrdu stipulá ku siguridat tampoko. Te na momento ku kobra aanslag pa e aña spesífiko ei por determiná e tarifa definitivo.
Si bo tin derechi pa apliká pa tarifa spesial riba entradanan ku ta relashoná ku mas ku un aña, bo por entregá un petishon na Inspektor di Impuesto via di verzoekbijzondertarief@gobiernu.cw.