Penshun di Biuda(o) i Werfano (AWW)
Penshun di Biuda(o) i Werfano (AWW)
Penshun di Biuda(o) i Werfano (AWW) ta un seguro general pa komunidat. E seguro aki ta duna sosten finansiero na esposo o esposa na momento di fayesimentu di nan partner i tambe na muchanan na momento di fayesimentu di nan tata òf mama.
Tur hende ku ta biba na Kòrsou ku ta mas bieu ku 15 aña, ta sigurá pa AWW. Tambe bo ta sigurá pa AWW si bo ta biba den eksterior, pero bo ta òf tabata den servisio serka un dunadó di trabou establesé na Kòrsou, i ku pa e motibu ei bo mester hasi deklarashon riba impuesto di entrada komo un kontribuyente lokal.
Bo no ta sigurá si:
- Bo ta un indokumentado;
- Bo tin un seguro igual na e pakete di seguro di AWW pafó di Kòrsou;
- Bo ta biba o traha temporalmente na Kòrsou;
- Bo partner i otro miembronan di famia ku ta biba temporalmente na Kòrsou tin un pakete di seguro igual pafó di Kòrsou.
Kuantu bo mester paga na prima ta dependé di kon haltu bo entrada for di kua bo mester paga prima for di dje ta. Si bo ta un trahadó, e ora ei bo dunadó di trabou ta retené e prima. Si bo no ta un trahadó, e ora ei bo ta paga e prima na momento ku bo risibí e aanslag di impuesto di entrada.
E prima pa AWW ta wòrdu kobrá na bo persona pa medio di e aanslag di impuesto riba entrada. Si bo ta den servisio serka un dunadó di trabou, bo dunadó di trabou ta retené bo prima. Si bo dunadó di trabou retené muchu hopi òf muchu tiki, e ora ei ta deskontá esei ainda via di e aanslag di impuesto riba entrada.
Manera bo entregá e deklarashon di impuesto riba entrada na Servisio di Impuesto, bo ta risibí un aanslag definitivo di impuesto riba entrada serka Servisio di Impuesto. Tambe bo ta risibí un aanslag pa e prima di AWW ku ta indiká kuantu bo mester paga. Den kaso ku bo mester paga bèk, e datonan di pago tambe lo ta indiká riba e aanslag.
Pa mas informashon, manera tokante di e porsentahenan di e primanan ku mester paga, bo por klek riba e lenk , ku lo referí bo na e página di SVB.