Opheshon
Na momento ku bo entregá un deklarashon, Inspektor ta manda un aanslag di impuesto pa bo. Si bo no ta di akuerdo ku e aanslag bo por bai den opheshon. Pa medio di un karta di opheshon bo ta informá Inspektor ku bo no ta di akuerdo ku e aanslag ku el a manda pa bo.
Den kaso ku bo ke bai den opheshon kontra di:
- Un aanslag ku a manda kobra bo;
- Un disposishon ku Inspektor a tuma i ku por wòrdu oponé pa motibu di demanda di impuesto.
Si e aanslag òf disposishon ta dirigí na bo, bo por bai den opheshon. Un otro persona tambe por prepará e opheshon na bo nòmber, esaki hopi biaha por ta bo konsehero di impuesto òf accountant. Pa esaki bo ta duna apoderashon na e persona pa e por atendé ku bo asuntunan di impuesto na bo nòmber.
Si bo a risibí un aanslag di impuesto i bo no ta di akuerdo ku esaki bo por bai den opheshon kontra di esaki. Tambe bo por bai den opshon kontra di un disposishon ku por wòrdu oponé, manera un multa.
Si bo ke bai den opheshon kontra di un aanslag di impuesto òf un disposishon, bo mester hasi esaki denter di 2 luna despues ku a firma e formulario di aanslag òf disposishon. Si bo entregá bo karta di opheshon despues di e 2 lunanan aki e petishon ta lat i lo no wòrdu tratá mas.
Bo ta manda un karta di opheshon motivá via di meil pa Inspektor: info.belastingdienst@gobiernu.cw. Den esaki bo ta skibi dikon bo no ta di akuerdo ku e aanslag ku a manda kobra bo. Si bo hasi un petishon den bo karta di opheshon pa bo wòrdu skuchá, bo ta risibí un invitashon pa esaki. Inspektor tambe por invitá bo pa duna splikashon òf pa informá bo dikon e aanslag ta hinká den otro di e manera ei.
Manera Inspektor risibí bo karta di opheshon e ta manda un komprobante ku el a risibí e karta di opheshon i ta indiká den esaki riba kua fecha el a risibí esaki. Si bo ke bai den opheshon kontra di mas ku un aanslag di impuesto òf disposishon, bo mester bai den opheshon pa kada aanslag di impuesto òf disposishon. Pues, bo no por entregá un karta di opheshon kontra di tur aanslag di impuesto huntu.
Si bo a bai den opheshon pa un aanslag òf disposishon ku bo mester paga, no ta nifiká ku bo no mester paga esaki. Ora bo bai den opheshon tambe bo mester paga e impuesto òf multa na tempu. Bo mester entregá un petishon pa suspenshon apart na Ontvanger.
Inspektor ta duna veredikto denter di 9 luna. Si Inspektor sa kaba ku e no por duna veredikto denter di 9 luna, bo ta risibi un karta por eskrito ku e motibu dikon no por duna un veredikto ainda. Den e karta e término nobo tambe ta wòrdu anunsiá. Por ekstendé e veredikto ku máksimo 9 luna adishonal.
Si bo a motivá bo karta di opheshon sufisiente Inspektor ta duna un veredikto. Inspektor por bai kompletu di akuerdo ku bo karta di opheshon; si e sentensia ta bon fundá, e ta di akuerdo ku bo. E aanslag lo wòrdu ahustá e ora ei. E sentensia por ta parsialmente bon fundá òf infundá; e ora ei bo ta haña rason parsialmente òf bo no ta haña rason. E ora ei bo ta risibí un motivashon di e sentensia serka Inspektor.
No ta konsedé un opheshon si bo oponé un aanslag ku bo a risibí, pasobra bo no a hasi deklarashon. Sí bo por bai den opheshon si ta mustra ku e aanslag ku bo a risibí no ta korekto.
Si Inspektor duna un sentensia i bo no ta di akuerdo, bo por apelá denter di 2 luna despues ku e sentensia a wòrdu firmá. Bo ta apelá e ora’ei na Tribunal.