Na momento ku bo no ta hasi uso mas di bo vehíkulo riba kaya públiko di Kòrsou i bo no ke paga impuesto riba vehíkulo motorisá (MRB) mas pa e vehíkulo ei, bo por entregá e plachi di number. Lo bo risibí restitushon pa e periodo ku bo a paga MRB p’e i ku bo no a hasi uso di dje. E plachi di number ta keda propiedat di Landsontvanger di Kòrsou. 

E siguiente asuntunan mester wòrdu entregá na WTC na Piscadera: 

• Tur dos plachi di number; 
• Karchi di Impuesto (di e último aña ku a paga impuesto p’e); 
• Steker (di e último aña ku a paga impuesto p’e).

Bo no por hasi entrega di e plachinan di number i e dokumentonan ariba menshoná pasobra: 

• Bo vehíkulo a wòrdu hòrtá; 
• Bo vehíkulo a kima? 

Den kaso di ladronisia bo mester entregá un deklarashon di polis (memorandum). Si bo vehíkulo a kima, bo mester di un deklarashon di Servisio di bombero. 

E restitushon ku bo ta risibí ta wòrdu kalkulá a base di e kuartalnan ku no a pasa ainda. Por ehèmpel: si bo entregá e plachinan di number riba 1 di yüli (promé dia di e di tres kuartal), e ora’ei bo ta risibí depósito di un kuartal di adelanto bèk riba bo kuenta di banko denter di 3 dia di trabou.  

Si bo por demostrá ku ya pa largu tempu bo no a hasi uso di bo vehíkulo riba karetera públiko (por ehèmpel dor di ladronisia, daño òf malesa grave), bo por risibí bèk kompensashon di e impuesto riba vehíkulo motorisá di e periodo ku a pasa ku forsa retroaktivo.