Bo tin mester di un number di CRIB pa e komunikashon ku gobièrnu. Por ehèmpel si bo ta importá produktonan for di eksterior, e ora ei Servisio di Impuesto ta manda bo number di CRIB outomátikamente pa Duana. Pero, bo tin mester di bo number di CRIB tambe na momento ku bo ta yena bo deklarashon riba impuesto di entrada. 

Pa inskribí na Servisio di Impuesto pa impuesto riba benta, impuesto riba salario i impuesto riba ganashi bo mester entregá algun komprobante na Servisio di Impuesto. E komprobantenan aki ta diferensiá pa forma hurídiko: 

Pa inskribí un N.V., un B.V., un fundashon òf un asosiashon bo mester entregá e siguiente komprobantenan: 

• Un akta di konstitushon (Akta notarial) di bo organisashon;
• Un kopia di registrashon na Kámara di Komèrsio; 
• Datonan di kompania relashoná ku representante i/òf direktor di e kompania; 
• Un prueba di identidat bálido (sédula òf pasport). 

Pa inskribí un negoshi unipersonal (eenmanszaak) bo mester entregá e siguiente komprobantenan: 

• Un kopia di registrashon na Kámara di Komèrsio; 
• Un prueba di identidat bálido (sédula òf pasport). 

Pa inskribí un sosiedat kolektivo (V.O.F) i/òf un sosiedat bo mester entregá e siguiente komprobantenan: 

• Un kopia di registrashon na Kámara di Komèrsio;
• Un kopia di akuerdo entre e sosionan; 
• Un prueba di identidat bálido (sédula òf pasport).

Den kaso ku tin empleadonan den servisio, mester entregá e siguiente informashon/komprobantenan na Servisio di Impuesto:

• Kantidat di empleado; 
• E fecha ku e promé empleado(nan) a drenta den servisio;
• E suma total di entrada bruto. 

Atenshon! Tur dokumento entregá mester ta bon kla i legibel.

Pa hasi petishon pa un number di CRIB, bo mester manda un meil na: cribbeheer@gobiernu.cw. Manera ku bo number di CRIB ta kla nos lo manda esaki na e adrès di meil ku ta konosí serka nos.