Digitaal Portaal wegens onderhoud offline

Pa pregunta, petishon òf informashon por hasi uso di nos formulario di kontakto nobo. Pa medio di e formulario di kontakto ta posibel pa yena tur informashon nesesario mesora pa asina nos por prosesá bo petishon efisiente for di inisio. Ku esaki nos ta evitá ku mester keda manda mail bai bin i nos por atendé bo petishon muchu mas lihé. Riba nos wèpsait tin diferente página ku ta referí na e formulario di kontakto nobo.

University of Curaçao Research Institute (UCRI) ta forma parti di Universidat di Kòrsou (UoC), i na nòmber di Servisio di Impuesto UCRI ta hasi  un investigashon pa midi e nivel di satisfakshon bou di kontribuyentenan. E meta di e investigashon akí ta pa kolektá informashon balioso tokante opinion, eksperensia i ekspektativanan di kontribuyentenan pa medio di un enkuesta digital. Diferente tema lo bini dilanti manera komunikashon ku Servisio di Impuesto (diferente servisio) i aspektonan manera konfiansa, imagen i integridat. E enkuesta ta keda hasí bou di kontribuyentenan na Kòrsou ku tin 18 aña òf mas di edat. Tantu hende partikular komo empresa ta keda invitá pa partisipá. E kontribuyente lo risibí un invitashon via e-mail ku un link pa partisipá na e enkuesta. E enkuesta ta disponibel den kuater idioma: Papiamentu, Hulandes, Ingles i Spañó. Partisipantenan por skohe e idioma preferí na momento ku kuminsá ku e enkuesta. E enkuesta ta kore di 16 di yüni te ku 12 di yüli 2026. Pa yena e enkuesta kompleto ta dura aproksimadamente 20 minüt i esaki ta kompletamente boluntario. Tur informashon ta keda prosesá i analisá den konfiansa i tur dato ta keda anónimo. Bo a risibí un invitashon via e-mail pero bo tin pregunta tokante e enkuesta? Tuma kontakto ku University of Curaçao Research Institute (UCRI) via email: ucri@uoc.cw òf via number di telefòn +5999 520-6144 (Whatsapp). Por fabor no tuma kontakto ku Servisio di Impuesto pa esaki. Bo partisipashon ta altamente apresiá. E resultado di e enkuesta ta aportá na mehorashon di e servisio di Servisio di Impuesto i ta importante pa por subi e satisfakshon bou di kontribuyentenan na Kòrsou.

Ontvanger di Kòrsou ta rekordá komunidat di Kòrsou ku por pega únikamente e plachinan di number ku a keda otorgá ofisialmente dor di Ontvanger riba vehíkulo motorisá pa kore riba kareteranan públiko. Ta prohibí pa imitá, falsifiká, bende plachi di number òf usa plachinan di number ku no ta ofisial! Esaki  ta kastigabel i por trese konsekuensia i medida hurídiko i/òf atministrativo. Outoridatnan lo kontrolá ku man duru riba esaki. Si durante un kontrol wòrdu determiná ku ta trata di un plachi di number falsifiká, imitá òf no-ofisial, lo tuma medida mesora. Esaki por ta den forma di un but i  lo konfiská e plachi(nan) di number konserní. Ontvanger ta supliká tur persona ku tin vehíkulo motorisá,  pa nan vehíkulo tin e plachi di number ofisial (otorgá  pa Ontvanger) pegá.