×
Ga terug

Portal Digital: un ambiente nobo

Willemstad – Kontinuamente Servisio di Impuesto ta traha riba optimalisashon di su servisionan digital. Despues ku a ekspandé e servisio na kliente ku un callcenter, renová e wèpsait I introdusí e number grátis, pronto e portal digital lo haña un bachi nobo.

Servisio di Impuesto ta bai duna mas atenshon na interakshon digital ku su klientenan i sosionan. E portal nobo ta un parti integral den esaki i a keda diseñá ku bista riba seguridat i fasilidat pa e usario. Esaki ta e promé paso pa yega na mas independensia, servisio online ​i komunikashon digital entre e kliente ku Servisio di Impuesto.

E portal ta wòrdu bishitá mas frekuente dor di e empresario i p’esei  un ambiente digital ku ta fásil i sigur ta importante. Den e portal nobo e kliente mes lo por kambia sierto informashon, manera entre otro nòmber, adrès i sitio. Banda di esaki e kliente por haña akseso na un inbox digital personal via kua Servisio di Impuesto por manda disposishon digital. Dor di minimalisá aanslag via pòst, Servisio di Impuesto ta indiká di bai mas den direkshon di un ambiente mas bèrdè i digital.

Dor di e informashon sensibel i privá di e kliente, ta di sumo importansia pa e portal digital keda mas sigur posibel. Pa e motibunan aki a intensifiká e medidanan di seguridat di e portal digital. E kliente lo  ripará esaki na e asina yamá two-factor authentication (2FA) ku lo bira mandatorio pa por drenta e portal digital. Esaki ta nifiká ku mester hasi dos paso promé ku por drenta e portal pero esaki ta hasi’é mas difísil pa personanan sin outorisashon. 

Pa por drenta e portal nobo i pa por risibí disposishon den e inbox personal, e kliente mester di un kuenta personal. Ta importante pa traha esaki mas lihé posibel.

Pa realisá e metanan ariba menshoná e  portal digital lo ​bai offline pa algun dia. Esaki lo sosodé di djaweps 5 sèptèmber 2024 te ku djamars 10 di sèptèmber 2024​.

Bèk na bista general

Artíkulonan relashoná

16 Jan 2026

Eksonerashon di impuesto riba suèldo i gastunan sosial riba suèldo di overtaim (Lei di Bion).

Empresarionan ku ke entregá e petishon pa eksonerashon di impuesto riba suèldo i gastunan sosial riba suèldo di overtaim, por hasi esaki pa mas tardá 2 di febrüari 2026. Tuma nota: pa bini na remarke pa e eksonerashon, e verzamellooonstaat 2025 mester ta entregá. Lesa mas tokante e verzamelloonstaat aki. E dunadónan di trabou ku no a apliká di Lei di Bion na 2025, mester entregá e verzamelloonstaat 2025 pa mas tardá riba 2 di febrüari 2025 segun e formato bieu. Pa dunadónan di trabou ku si a hasi uso di Lei di Bion na 2025, ainda no ta posibel pa entregá e verzamelloonstaat 2025, mirando tin retraso den e adaptashonnan. E dunadónan di trabou outomátikamente ta risibí prolongashon pa entregá e verzamelloonstaat 2026 pa mas tardá 1 di aprel 2026. Pa e dunadónan di trabou aki ta sufisiente pa yena e fail di Excel pa registrashon di overtaim. Den e fail aki por indiká e suèldo di overtaim ku a keda eksonerá. Asina e verzamelloonstaat keda adaptá, e dunadónan di trabou ta risibí informashon tokante esaki.
  • Link na formulario di eksonerashon
  • Link na fail di registrashon di overtaim i instrukshon pa registrashon di overtaim
Pa nos por prosesá bo petishon di un forma efisiente ta nesesario ku tur informashon keda entregá kompleto i korekto.
Lesa mas
12 Jan 2026

Pago di impuesto riba vehíkulo motorisá i finalisashon di vehíkulo pa aña 2026.

Ontvanger di Kòrsou ta duna di konosé ku entrante 12 di yanüari 2026 ta kuminsá ku kobransa di impuesto riba vehíkulo motorisá i finalisashon di vehíkulo pa aña 2026. Pa por paga mester trese e siguiente dokumentonan: 
  1. Karchi di kùr bálido;
  2. Komprobante di seguro bálido;
  3. Komprobante di pago di MRB 2025.
Ora paga e promé mitar di aña ta risibí e plachi di number 2026 Ora paga pa henter aña ta risibí e sticker blou I e plachi di number 2026. E plachinan di number 2026 lo keda otorgá dor di Ontvanger despues. Unda bo por paga impuesto riba vehíkulo motorisá?  Bo por paga e impuesto riba vehíkulo motorisá i e impuesto di finalisashon di vehíkulo na e siguiente lugánan:
  1. Landsontvanger na Regentesselaan Djaluna pa djabièrnè for di 08:00or pa 12:00or i di14:00or te ku 15:30or
  2. Kooperativa di Spar i di Krédito ACU, di djaluna pa djabièrnè for di 08:00 or pa15:30 or sin stòp na Jan Noorduynweg i Zuikertuin Mall.
  3. CPost International na Punda i Groot Kwartier for di 7.30 or pa 17.00 or sin stòp  di djaluna te ku djaweps, djabièrnè di 7.30 or pa 16.30 or i djasabra di 8.00 or pa 11:30 or.
Por paga pa 2026 si bo a hasi bo pago di MRB te ku desèmber 2025. Tarief 2026 half en heel jaar
Lesa mas
09 Jan 2026

Petishon Urgente pa yena e kuestionario FATF pa organisashonnan Non-Profit na Kòrsou.

Servisio di Impuesto Kòrsou ta informá tur non-profit ku ta operá riba Kòrsou ku un petishon importante.  Na 2025 Financial Action Task Force (FATF), a evaluá kumplimentu di Kòrsou ku stándart internashonal pa labamentu di plaka i finansiamentu di terorismo. For di e evaluashon aki a bini dilanti algun punto di akshon ku Kòrsou mester atendé, pa evitá ku e Pais ta ser inkluí riba e lista gris di FATF. Un di e puntonan di akshon ta e nesesidat pa haña un mihó bista riba e sektor di non-profit na Kòrsou. Pa e motibu aki, a krea un kuestionario pa determiná kua organisashon ta kai bou di e definishon di FATF. Asina por kolektá informashon importante riba e struktura, aktividat, i situashon finansiero di kada organisashon. Kiko esaki ta nifiká pa e organisashon non-profit? Kada organisashon non-profit lo risibí un karta formál i kuestionario den su buson. Servisio di Impuesto di Kòrsou ta pidi pa tur ku a risibí esaki por fabor kompletá e kuestionario di forma korekto, más tardá djaluna 12 di yanüari 2026. Esaki ta di gran importansha pa yuda Kòrsou den su kumplimentu ku su obligashon internashonal i pa sigurá ku ta kumpli ku e standart di FATF. Link di e online di e kuestionario Pa fasilitá e proseso, Servisio di Impuesto di Kòrsou a kreá un plataforma online kaminda e kuestionario por wòrdu kompletá direktamente. Por yena e informashon rekerí na ingles òf hulandes pa medio di e siguiente link: E sistema online lo hasi e proseso mas fásil i sigurá ku tur informashon ta bai di un manera seif i lihé. Deadline E kuestionario kompletu mester wòrdu entregá pa mas tardá 12 di yanüari 2026 via e plataforma online. Si un OSL no por kompleta e kuestionario elektróniko, lo por mail e dokumento kompletu na Servisio di Impuesto di Kòrsou via: info.belastingdienst@gobiernu.cw  Tur informashon lo wòrdu tratá ku konfidensial i lo wòrdu usá solamente pa e kumplimentu di standart internashonal. Boso koperashon ta esensial pa mantené e posishon di Kòrsou den e lucha global kontra labamentu di plaka i finansiamentu di terorismo. *Un non-profit ta un organisashon ku su meta no ta pa tin ganashi, pero ku ta enfoká riba e benefisio di komunidat. Esaki por inkluí fundashon, organisashon di benefisio soshal, i organisashon ku ta traha pa mehorá e bienestar di e pueblo.  Pa mas informashon si bo tin pregunta òf ke klarifikashon tokante e kuestionario òf e prosedura pa entregá, por tuma kontakto ku e servisio di impuesto di Kòrsou via e number di 'helpdesk' 461-5000.  
Lesa mas