×
Ga terug

Obligashonnan di pago ta keda na vigor. Por hasi areglo di pago

Apesar di e limitashonnan den servisionnan di Servisio di Impuesto en konekshon ku e atake resien di ransomware, Servisio di Impuesto ke enfatisá ku tur kontribuyente tin di kumpli ku nan deber di pago na tempu. E sistemanan pa prosesá pago ta operashonal i Ontvanger ta habrí pa por pasa paga òf hasi areglo di pago.

Por paga via:

  1. Kanalnan digital di kustumber (online)
  2. Bo karchi di banko na kaha (na Regentesselaan z/n)
  3. Pago kèsh via Pagafasil na e puntonan di servisio di kustumber
  4. Un areglo di pago ku Ontvanger, si bo no tin moda di paga mesora

Evitá but i medida di kobransa dor di paga na tempu. E opshon di hasi areglo di pago ta un alivio pa esnan ku no ta den posishon pa paga mesora. Ontvanger ta atendé e petishonnan manera kustumber.

Tene na kuenta:
Djaweps 31 di yüli ta e delaster dia ku por entregá un petishon pa un areglo di pago sin interes. Enrante 1 di ougùstùs ta konta ku forsa retroaktivo te ku 1 di aprel 2023 un interes di 6,75% riba e montante habrí ku debe, a ménos ku a hasi un petishon pa un areglo di pago via e formulario promé ku 1 di ougùstùs.

Servisio na Kliente ainda no ta alkansabel en persona ni via telefòn. Pregunta tokante deklarashon òf e portal digital por keda hasí via nos formularionan digital òf via e-mail.

Mientrastantu, Servisio di Impuesto ta sigui traha duru pa pone su sistemanan bèk den servisio. Siguridat di e datonan i sistemanan ta keda e prioridat di mas haltu.

Informashon tokante pago, areglo di pago i orario di servisio ta disponibel via e kanalnan ofisial di Servisio di Impuesto Kòrsou.

Bèk na bista general

Artíkulonan relashoná

16 Jan 2026

Eksonerashon di impuesto riba suèldo i gastunan sosial riba suèldo di overtaim (Lei di Bion).

Empresarionan ku ke entregá e petishon pa eksonerashon di impuesto riba suèldo i gastunan sosial riba suèldo di overtaim, por hasi esaki pa mas tardá 2 di febrüari 2026. Tuma nota: pa bini na remarke pa e eksonerashon, e verzamellooonstaat 2025 mester ta entregá. Lesa mas tokante e verzamelloonstaat aki. E dunadónan di trabou ku no a apliká di Lei di Bion na 2025, mester entregá e verzamelloonstaat 2025 pa mas tardá riba 2 di febrüari 2025 segun e formato bieu. Pa dunadónan di trabou ku si a hasi uso di Lei di Bion na 2025, ainda no ta posibel pa entregá e verzamelloonstaat 2025, mirando tin retraso den e adaptashonnan. E dunadónan di trabou outomátikamente ta risibí prolongashon pa entregá e verzamelloonstaat 2026 pa mas tardá 1 di aprel 2026. Pa e dunadónan di trabou aki ta sufisiente pa yena e fail di Excel pa registrashon di overtaim. Den e fail aki por indiká e suèldo di overtaim ku a keda eksonerá. Asina e verzamelloonstaat keda adaptá, e dunadónan di trabou ta risibí informashon tokante esaki.
  • Link na formulario di eksonerashon
  • Link na fail di registrashon di overtaim i instrukshon pa registrashon di overtaim
Pa nos por prosesá bo petishon di un forma efisiente ta nesesario ku tur informashon keda entregá kompleto i korekto.
Lesa mas
12 Jan 2026

Pago di impuesto riba vehíkulo motorisá i finalisashon di vehíkulo pa aña 2026.

Ontvanger di Kòrsou ta duna di konosé ku entrante 12 di yanüari 2026 ta kuminsá ku kobransa di impuesto riba vehíkulo motorisá i finalisashon di vehíkulo pa aña 2026. Pa por paga mester trese e siguiente dokumentonan: 
  1. Karchi di kùr bálido;
  2. Komprobante di seguro bálido;
  3. Komprobante di pago di MRB 2025.
Ora paga e promé mitar di aña ta risibí e plachi di number 2026 Ora paga pa henter aña ta risibí e sticker blou I e plachi di number 2026. E plachinan di number 2026 lo keda otorgá dor di Ontvanger despues. Unda bo por paga impuesto riba vehíkulo motorisá?  Bo por paga e impuesto riba vehíkulo motorisá i e impuesto di finalisashon di vehíkulo na e siguiente lugánan:
  1. Landsontvanger na Regentesselaan Djaluna pa djabièrnè for di 08:00or pa 12:00or i di14:00or te ku 15:30or
  2. Kooperativa di Spar i di Krédito ACU, di djaluna pa djabièrnè for di 08:00 or pa15:30 or sin stòp na Jan Noorduynweg i Zuikertuin Mall.
  3. CPost International na Punda i Groot Kwartier for di 7.30 or pa 17.00 or sin stòp  di djaluna te ku djaweps, djabièrnè di 7.30 or pa 16.30 or i djasabra di 8.00 or pa 11:30 or.
Por paga pa 2026 si bo a hasi bo pago di MRB te ku desèmber 2025. Tarief 2026 half en heel jaar
Lesa mas
09 Jan 2026

Petishon Urgente pa yena e kuestionario FATF pa organisashonnan Non-Profit na Kòrsou.

Servisio di Impuesto Kòrsou ta informá tur non-profit ku ta operá riba Kòrsou ku un petishon importante.  Na 2025 Financial Action Task Force (FATF), a evaluá kumplimentu di Kòrsou ku stándart internashonal pa labamentu di plaka i finansiamentu di terorismo. For di e evaluashon aki a bini dilanti algun punto di akshon ku Kòrsou mester atendé, pa evitá ku e Pais ta ser inkluí riba e lista gris di FATF. Un di e puntonan di akshon ta e nesesidat pa haña un mihó bista riba e sektor di non-profit na Kòrsou. Pa e motibu aki, a krea un kuestionario pa determiná kua organisashon ta kai bou di e definishon di FATF. Asina por kolektá informashon importante riba e struktura, aktividat, i situashon finansiero di kada organisashon. Kiko esaki ta nifiká pa e organisashon non-profit? Kada organisashon non-profit lo risibí un karta formál i kuestionario den su buson. Servisio di Impuesto di Kòrsou ta pidi pa tur ku a risibí esaki por fabor kompletá e kuestionario di forma korekto, más tardá djaluna 12 di yanüari 2026. Esaki ta di gran importansha pa yuda Kòrsou den su kumplimentu ku su obligashon internashonal i pa sigurá ku ta kumpli ku e standart di FATF. Link di e online di e kuestionario Pa fasilitá e proseso, Servisio di Impuesto di Kòrsou a kreá un plataforma online kaminda e kuestionario por wòrdu kompletá direktamente. Por yena e informashon rekerí na ingles òf hulandes pa medio di e siguiente link: E sistema online lo hasi e proseso mas fásil i sigurá ku tur informashon ta bai di un manera seif i lihé. Deadline E kuestionario kompletu mester wòrdu entregá pa mas tardá 12 di yanüari 2026 via e plataforma online. Si un OSL no por kompleta e kuestionario elektróniko, lo por mail e dokumento kompletu na Servisio di Impuesto di Kòrsou via: info.belastingdienst@gobiernu.cw  Tur informashon lo wòrdu tratá ku konfidensial i lo wòrdu usá solamente pa e kumplimentu di standart internashonal. Boso koperashon ta esensial pa mantené e posishon di Kòrsou den e lucha global kontra labamentu di plaka i finansiamentu di terorismo. *Un non-profit ta un organisashon ku su meta no ta pa tin ganashi, pero ku ta enfoká riba e benefisio di komunidat. Esaki por inkluí fundashon, organisashon di benefisio soshal, i organisashon ku ta traha pa mehorá e bienestar di e pueblo.  Pa mas informashon si bo tin pregunta òf ke klarifikashon tokante e kuestionario òf e prosedura pa entregá, por tuma kontakto ku e servisio di impuesto di Kòrsou via e number di 'helpdesk' 461-5000.  
Lesa mas