Lei di Labizjan (AVBZ)
Lei di Labizjan (AVBZ)
E lei di Seguro General di Gastunan pa Malesanan Spesial (Algemene Verzekering Bijzondere Ziektekosten), konosí komo Lei di Labizjan, ta un seguro general pa komunidat. Meta di e seguro aki ta pa kubri e gastunan di tratamentunan médiko i di kuido di malesanan króniko. E lei ta kubri e riesgo di e gastunan haltu ku no por òf ku ta demasiado haltu pa sigurá.
Tur hende ku ta biba na Kòrsou ku tin 15 aña bai ariba ta sigurá pa AVBZ. Si bo no ta biba na Kòrsou, pero bo ta den servisio serka un dunadó di trabou establesé na Kòrsou i si bo ta paga impuesto riba salario na Kòrsou, bo tambe ta sigurá pa ABVZ.
Bo no ta sigurá pa AVBZ si bo ta mas yòn ku 15 aña i/òf si bo no ta kumpli ku e kondishonnan ariba menshoná.
Atenshon! E obligashon pa kumpli ku e prima aki no ta kaba na momento ku bo yega e edat di 65 aña. Mester paga e prima aki for di e promé dia di e luna despues ku kumpli e edat di 15 aña. E prima general ta 2%. Pa penshonadonan e prima ta 1,5%. Pa esnan ku ta obligá pa kumpli ku e prima aki i tin un entrada te ku 26.677 florin (montante 2023) un prima di 1% ta aplikabel.
Pa e kasonan kaminda e prima di 2% ta aplikabel, 1,5% ta kai pa kuenta di e trahadó i 0,5% ta kai pa kuenta di esun responsabel pa hasi retenshon. Den kaso ku e porsentahe ta 1%, 0,5% ta kai pa kuenta di esun responsabel pa retenshon i 0,5% ta kou pa kuenta di e trahadó. E tarifa di 1,5% pa penshonadonan ta kai kompletamente pa kuenta di e penshonado.
Den kaso ku por ehèmpel e entrada for di kua mester paga prima ku a risibí pa aña 2023 ta mas ku 565.926,54 florin, no mester paga prima riba e montante adishonal. E prima máksimo pa AVBZ pa aña 2023 ta 11.318,53 florin.
Kuantu bo mester paga na prima ta dependé di kon haltu bo entrada for di kua bo mester paga prima for di dje ta. Si bo ta un trahadó, bo prima ta konsistí di un parti ku ta kai bou di dunadó di trabou (werkgeversdeel) i un parti ku ta kai bou di trahadó, e asina yamá ‘werknemersdeel’. E ora ei e dunadó di trabou ta retené e prima. Si bo no ta un trahadó, e ora ei bo ta paga e prima na momento ku bo risibí e aanslag di impuesto di entrada.
E prima pa AVBZ ta wòrdu kobrá na bo persona pa medio di e aanslag di impuesto riba entrada. Si bo ta den servisio serka un dunadó di trabou, e dunadó di trabou ta retené bo prima. Si bo dunadó di trabou retené muchu hopi òf muchu tiki, e ora ei ta deskontá esei despues via di e aanslag di impuesto di entrada. Esaki ta konta solamente pa e parti ku ta kai bou di trahadó, e parti ku ta kai bou di dunadó di trabou si bo no ta risibí bèk.
Manera bo entregá e deklarashon di impuesto di entrada na Servisio di Impuesto, bo ta risibí un aanslag definitivo di impuesto di entrada serka Servisio di Impuesto. Tambe bo ta risibí un aanslag pa e prima di AVBZ ku ta indiká kuantu bo mester paga. Den kaso ku bo mester paga bèk, e datonan di pago tambe lo ta indiká riba e aanslag.
Pa mas informashon, manera tokante di e porsentahenan di e primanan ku mester paga, bo por klek riba e lenk ku lo referí bo na e página di SVB.