Vensementu di debe
Vensementu di debe
Lei ta indiká ku no por obligá un kontribuyente pa paga un debe di impuesto despues di 5 aña, den kaso ku Ontvanger no a tuma akshon na tempu. Pa e motibu ei, legislador a determiná ku un debe di impuesto ta vense en prinsipio 5 aña despues di e fecha ku e aanslag a sali. Ku un debe di impuesto a vense ta nifiká ku Ontvanger no por entamá un kaso hurídiko mas pa obligá e kontribuyente pa paga, sin embargo, e debe di impuesto ta keda eksistí si. Esaki ta reglá den e Ordenansa di Kobransa di 1954 (Kòrsou) art 10.
Vensementu di debe, sin embargo, ta wòrdu impedí dor di rekonosementu di e debe di impuesto na e siguiente formanan:
- Sea pa medio di palabra;
- Sea pa medio di aktonan di eksistensia di e debe di impuesto;
- Dor di kobransa òf un òrdu obligatorio;
- Dor di un akto di ehekushon di un òrdu obligatorio.
Den kaso ku bo a risibí un karta di kobransa, rekonosementu òf òrdu obligatorio den e último 5 añanan, e ora ei e término di vensementu di 5 aña ta kuminsá konta di nobo.
Por impedí e término di kaduká dor di:
- Firma un akta di persekushon;
- Rekonosementu di e debe di impuesto (pa medio di palabra òf hechonan). Entregamentu di un karta di opheshon kaminda henter e debe ta wòrdu kuestioná no tin mag di wòrdu mirá sin embargo, komo rekonosementu di debe. Pago ta un forma di rekonosé debe, dedukshon no.
Si bo ta sospechá ku bo aanslagnan a kaduká, bo mester entregá un petishon por eskrito. Bo mester indiká bo number di CRIB i bo number di aanslag.
Bo por hasi esaki na bali i/òf via di meil: info.belastingdienst@gobiernu.cw.
Bo debe no ta ser anulá pa motibu ku el a kaduká. Si bo a paga un debe ku a kaduká, bo no por risibí e sèn despues bèk ku un akshon for di un pago índebido.
Si ainda bo tin pregunta tokante di bo debenan ku a kaduká, bo por tuma kontakto semper ku Servisio di Impuesto.
E kobradó no tin mag di apliká vensementu di debe na nòmber di e kontribuyente, ni hues no tin e outorisashon ei. Ta rekerí eksplísitamente pa e kontribuyente hasi un petishon pa vensementu. Si e kontribuyente pidi e kobradó eksplísitamente si un aanslag a kaduká, e kobradó mester kontestá esaki di akuerdo ku bèrdat.