Apelashon
Apelashon
Si bo a bai den opheshon serka Inspektor, bo a risibí e sentensia i bo no ta di akuerdo ku e sentensia aki, e ora ei bo por apelá e sentensia.
E interesado ku ta oponé e sentensia di e Inspektor por apelá esaki. Bo ta un interesado si bo ta kontribuyente pa e aanslag spesífiko ku ta bai apelá riba dje. Meskos ku den kaso di un karta di opheshon, bo por apoderá un persona por eskrito pa aktua na bo nòmber i laga e persona ei hasi e prosedura di apelashon.
Bo por apelá kontra di un sentensia di Inspektor riba bo opheshon. Komo sentensia ta konta tambe si bo no a risibí sentensia òf no a risibí sentensia na tempu serka Inspektor. E sentensia no ta na tempu si Inspektor no hasi esaki denter di 9 luna despues di a risibí bo karta di opheshon.
Bo por apelá denter di 2 luna despues di risibí sentensia riba bo karta di opheshon. Si Inspektor no a duna sentensia bo por apelá denter di 12 luna (despues di e término di 9 luna).
Si bo ke apelá na Tribunal bo mester entregá un karta di apelashon na griffier di Tribunal. E karta di apelashon mester ta bon motivá. For di e karta di apelashon mester bini dilanti kiko ta e motibu di e karta di apelashon i un kalkulashon kiko segun abo ta e montante ku bo mester paga na impuesto. Si no mester a manda aanslag pa bo òf si bo no ta debe impuesto, mester tin un motivashon pa esaki. Na momento ku bo ta entregá e karta di apelashon bo mester añadí e karta di opheshon tambe.
Griffier lo manda bo karta di apelashon tambe pa e Inspektor ku bo ta apelá kontra dje. Inspektor lo manda e karta di apelashon bèk huntu ku un karta di defensa na Tribunal, denter di 2 luna despues ku el a risibí esaki. Denter di un siman ku Tribunal a risibi e karta di defensa lo bo risibi un kopia di esaki.
Tribunal por yama abo i Inspektor pa duna mas informashon.
Manera e periodo pa duna karta di defensa pasa òf ku a entregá un karta di defensa, i bo no a hasi uso di e posibilidat pa splika bo karta di apelashon verbalmente, e presidente di Tribunal lo pone un fecha mas lihé posibel pa kontinuá ku e kaso.
Tribunal por pidi tantu abo komo Inspektor pèrmit por eskrito pa duna sentensia sin tratamento verbal.
Te ora ku abo i e Inspektor wòrdu invitá pa trata e kaso, Tribunal por duna sentensia inmediato si:
- Tribunal no ta outorisá;
- E apelashon no ta bálido:
- E apelashon no ta funda;
- E apelashon ta funda.
Si esaki no ta e kaso, Tribunal lo manda e sentensia por eskrito pareu pa bo i pa Inspektor.
Si ainda bo no ta di akuerdo ku e sentensia di Tribunal, e ora ei bo por apelá na Hòf. E apelashon di promé instansia ta wòrdu prepará denter di 2 luna ku risibí e sentensia di Tribunal. E ora ei bo por entregá un karta di apelashon na griffier di Hòf i griffier lo manda un kopia pa e Inspektor. E karta di apelashon aki tambe mester ta bon motivá. E ora ei Inspektor por entregá un karta di defensa denter di 2 luna despues di a risibí e karta di apelashon. Lo bo risibí un kopia di esaki.
Hòf por sigui e sentensia di Tribunal, pero tambe e por mehorá e sentensia òf destruí e sentensia parsialmente òf totalmente.